Astanada bes memlekettiń robot qurastyrýshy balalary bas qosty
ASTANA. KAZINFORM – Astanada robototehnıkadan Ortalyq Azııadaǵy eń aýqymdy doda – Central Asia FIRST Championship chempıonaty bastaldy. Aldaǵy úsh kúnde bes memleketten kelgen 3 myńnan astam mektep oqýshysy ózara básekege túsedi.
Jarysty uıymdastyrǵan «USTEM Foundation» qoǵamdyq qorynyń jetekshisi Asylbek Myrzahmetovtyń aıtýynsha, bıylǵy baıqaýǵa Ózbekstan, Qyrǵyzstan, Birikken Arab Ámirlikteri jáne Gonkong oıynshylary bas qosty. Eń ozyq shyqqan 4 komanda sáýir aıynyń sońynda AQSh-taǵy Hıýston qalasynda ótetin búkilálemdik baıqaýǵa barady.
Konkýrs álemdik FIRST baǵdarlamasy aıasynda úsh jas kategorııasy boıynsha ótedi: FLL Explore (6-10 jas), FLL Challenge (10-16 jas) jáne FIRST Tech Challenge (12-18 jas). Úsh sanatta 200-ge jýyq komanda robototehnıka salasynda óz jetistikerimen bóliskeli otyr.
«FIRST chempıonattary jyl saıyn túrli taqyryptar boıynsha ótkiziledi. Bıylǵy maýsym taqyryby kreatıvti ındýstrııa, shoý jáne óner týraly bolmaq. Komandalar ózderiniń ınjenerlik qabiletterin qoldanyp, osy ındýstrııadaǵy kompanııalardyń jáne adamdardyń problemalaryn sheshýi kerek. Mysaly keı komandalar kıno túsiretin operatorlarǵa, sýret salatyn adamdarǵa arnaıy kómekshi qurylǵylar jasaıdy. Bir komanda dombyraǵa arnalǵan trenajer jasady. ıAǵnı balalardy tek qana robototehnıka men baǵdarlama emes, jan jaqty tulǵa retinde damytý kózdelgen», - dedi A. Myrzahmetov elordalyq Oqýshylar saraıynda tilshilerge bergen suhbatynda.
Qazaqstan bul jarystarǵa 2017 jyldan beri qatysyp keledi jáne eki ret álemdik absolıýtti chempıon atanǵan.
«Chempıonatqa 2017 jyly AQSh-ta alǵash ret qatysyp, 8-oryn alǵan edik. Keıin 2019 jyly Birikken Arab ámirlikterine baryp, 190 eldiń arasynda qola júlde aldyq. Pandemııadan keıin 2022 jyly Jenevada ótken jarysta 180 el arasynda eshbir jeńilissiz Álem chempıony atandyq. Byltyrǵy qazan aıynda Qazaqstan Sıngapýrda 191 el arasynda taǵy da jeńilissiz absolıýtti chempıon atandy. Basqa eldermen salystyrǵanda bizdiń elde robototehnıka óte qarqyndy damyp keledi. Qazir el mektepterinde 3 myńnan astam robototehnıka uıymdary ashylǵan», - dedi spıker.
Búgingi Ortalyq Azııa chempıonatyna Qazaqstannan 500-den astam bala qatysyp jatyr. Olar elimizdiń túkpir-túkpirinen jáne aýyldardan iriktelgen.
Baıqaý jeńimpazdaryna baǵaly syılyqtar, AQSh, Avstralııa, Sıngapýrdaǵy halyqaralyq olımpıadalarǵa qatysýǵa lıtsenzııalar, qazaqstandyq jáne sheteldik joǵary oqý oryndaryna granttar, sondaı-aq Oqý-aǵartý mınıstrliginiń I, II, III dárejeli dıplomdarymen marapattalady.
Chempıonatty «Daryn» respýblıkalyq ǵylymı-praktıkalyq ortalyǵy, «USTEM Foundation» jáne Astana qalasynyń Bilim basqarmasy QR Oqý-aǵartý mınıstrliginiń jáne Astana qalasy ákimdiginiń qoldaýymen birlesip ótkizýde.
