Astanada benzınniń jalǵan talondary paıda boldy
ASTANA. QazAqparat - Áleýmettik jelilerdiń paıdalanýshylary janar-jaǵarmaı quıý beketteriniń mańynda belgisiz adamdar benzınge arnalǵan jalǵan talondardy saýdalap júrgenine shaǵymdaryn aıtýda, dep habarlaıdy QazAqparat.
«Meniń qateligimdi qaıtalaýdan saq bolyńyzdar! Keshe Respýblıka dańǵyly boıynda 40 jas shamasyndaǵy bir er adam maǵan AI-92 benzınine talon satyp alýdy usyndy. Onda 100 lıtr boldy, men tek 50 lıtrin aldym. Búgin Sınooılge barsam, operator bul talondardyń jalǵan ekenin aıtty»,-dep jazdy Facebook-te Natýsıa Best esimdi paıdalanýshy.
Atap aıtqanda, bul jalǵan talonǵa kózben bir qaraǵanda tupnusqadan aıyrmashylyǵy baıqalmaıdy jáne ekinshi jaǵyna mór de basylǵan. Alaıda, qolǵa alǵan kezde túpnusqadan aıyrmashylyǵyn anyqtaýǵa bolady, sonymen qatar onda arnaıy belgi japsyrylýy tıis.
«Qalada burynnan beri kez kelgen adamnan talon almaý týraly eskertý jasalyp keledi... Sebebi, olardyń arasynda jalǵan talondar óte kóp»,-degen oıymen bólisken Bitner Katrin esimdi paıdalanýshy.
Belgili bolǵandaı, osyndaı jaǵdaı jıi kezdesedi eken. Áleýmettik jeliniń ózge de paıdalanýshylary óz pikirlerinde alaıaqtardyń qurbany bolǵandyǵy týraly jazýda. Osy oraıda olar jalǵan talondardyń fotosýretterin salyp, kópshiliktiń nazaryna usynyp jatyr.
«Men de jeltoqsanda Respýblıka dańǵylynda satyp alǵan bolatynmyn»,-dep shaǵymdandy Dauren Yerkassov.
Budan buryn habarlanǵandaı, Qazaqstanda suranysy joǵary AI-92 markaly benzıniniń baǵasy ósken bolatyn.
