Astanada belgisiz er adam meshitke kelýshilerge pyshaq ala júgirgen

ASTANA. KAZINFORM – Áleýmettik jelide er adamnyń elordadaǵy meshitke kelýshilerdi pyshaqpen qorqytqan vıdeosy tarady. 

«102-arnasyna qala meshitteriniń birinde belgisiz adam kelýshilerge qaýip tóndirgeni týraly habarlama kelip tústi. Oqıǵa ornyna dereý polıtsııa jasaǵy keldi. 36 jastaǵy kúdikti jedel túrde ustalyp, polıtsııa bólimine jetkizildi. Odan qoldan jasalǵan pyshaq tárkilendi», - delingen elorda polıtsııa departamentiniń baspasóz qyzmeti taratqan habarlamada.

Tártip saqshylary tekserý barysynda ustalǵan adamnyń 2006 jyldan bastap psıhonevrologııalyq dıspanserde esepte turǵanyn anyqtaǵan.

«Atalǵan fakti boıynsha qylmystyq is qozǵaldy. Qazirgi ýaqytta bolǵan oqıǵanyń barlyq mán-jaıyna jan-jaqty tekserý júrgizilýde», - deıdi vedomstvodan.