Astanada belgili jýrnalısti qoldaýǵa arnalǵan qaıyrymdylyq aktsııasy ótti
ASTANA. QazAqparat - Astanada aýyr naýqasqa shaldyqqan tanymal sport jýrnalısi Galına Polevaıany qoldaýǵa arnalǵan qaıyrymdylyq júgirý aktsııasy ótti, dep habarlaıdy QazAqparat tilshisi.
Qaıyrymdylyq sharasy elordadaǵy «Stolıchnyı» (Astanalyq) saıabaǵynda «Sport biriktiredi» degen ataýmen ótti.
Shamamen 100-ge jýyq adam otandyq jýrnalısti qoldaýǵa jınaldy. Aktsııa barysynda erler 2,5, áıelder 1,5 shaqyrymǵa júgirip ótti. «Habar» telearnasynda jumys istegen Galına Polevaıa birneshe jyl qatarynan halyqaralyq Olımpıada, Azıada jáne taǵy basqa sporttyq jarystardy kógildir ekran arqyly halyqqa jetkizdi.
«Galına Polevaıa otandyq sport jýrnalıstıkasynda qalyptasqan tulǵa. Meniń ózim onyń telearnada júrgizgen baǵdarlamasyn úzbeı qaraıtynmyn. Ol naǵyz óz isiniń kásibı mamany. Bizdiń búgingi sharamyz odan ári óńirler de óz jalǵasyn tabady degen úmittemin. Men onyń bul qıyndyqtan súrinbeı ótetinine senemin», - dedi QR Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Serik Jarasbaev.
Júgirý jarysyna qatysqandardyń eń úlkeni 70-te, eń kishisi 5 jasta. Qaıyrymdylyq sharasynan 300 myń teńgege jýyq qarajat jınaldy. Jınalǵan barlyq soma G.Polevaıanyń otbasyna tabystalady.
Budan bólek jýrnalıske qoldaý retinde QR Mádenıet jáne mınıstrligi qyzmetkerleri bir kúndik jalaqylaryn bóledi. Sonymen qatar, QR Mádenıet jáne sport mınıstri Arystanbek Muhamedıuly óziniń áleýmettik jelidegi paraqshasynda halyqty Galına Polevaıany qoldaýǵa shaqyrǵan bolatyn.
Aıta keteıik, tanymal jýrnalıstiń aýyr naýqasqa shaldyqqany týraly onyń qyzy áleýmettik jeli arqyly aıtyp, jurtshylyqtan qol ushyn sozýdy suraǵan bolatyn. Áleýmettik jelidegi jazbada aıtylǵandaı jýrnalıst qaterli isikke shaldyqqan, oǵan tıisti em Koreıada qabyldanady jáne emdelý quny 286 myń 350 dollardy quraıdy.
