Astanada belgili sýretshi Baqtybek Talqambaevtyń jeke kórmesi ashyldy

Kórmede B.Talqambaevtyń 1986-2012 jyldar aralyǵynda salynǵan 32 týyndysy usynylǵan. Onyń shyǵarmalary tańbaly órnekten qurylǵan kompozıtsııalardan turady. Murajaı dırektory Nellı Shıvrınanyń aıtýynsha, sýretshiniń art-stýdııasynda ár jastaǵy adamdar sýretpen, keskindememen aınalysa kele óz boılaryndaǵy syrqattardan arylýǵa jol tabady eken. Osylaısha, ol erkin shyǵarmashylyq júıesine súıene otyryp, júıkeni qalpyna keltirý ádistemesin jasady. Kórmeniń ózgesheligi de osy. Onyń aıtýynsha, bul ádisti Japonııa, AQSh jáne birqatar Eýropa elderiniń ǵalymdary qabyldaǵan.

«Kórmedegi jumystar avangardtyq baǵyt, abstraktsııalyq aǵymda salynǵan. Onyń Almatyda, Astanada jáne Shymkentte birneshe myńdaǵan shákirtteri bar», - deıdi N.Shıvrına kórmeniń ashylý saltanatynda.

Qazaqstan Sýretshiler odaǵynyń múshesi Baqtybek Omaruly Talqambaev 1949 jyly Ońtústik Qazaqstan oblysynda dúnıege keldi. Máskeý sáýlet ınstıtýtynyń sáýlet fakýltetin, KSRO Sýretshiler odaǵy janyndaǵy E.Rozemblıýmniń dızaın ortalyq oqý-ádistemelik stýdııasyn bitirgen. Qylqalam sheberi uzaq jyl boıy qoldanbaly ónerdiń san túrli salasynda jemisti eńbek etip keledi. Ol qazaqy úıge qajetti esikter, kebejeler, ydys-aıaqtardy aǵashtan oıdy. Sáýletshi retinde Shymkent qalasyndaǵy birqatar ǵımarattardyń jobasyn jasady. Onyń kóptegen óner týyndylary Japonııa, AQSh, Frantsııa, Bolgarııa, Norvegııa jáne TMD elderinde jeke kollektsıonerlerdiń qorynda saqtaýly.