Astanada belgili pýblıtsıst, ádebıet synshysy, jazýshy M. Qarataevtyń 100 jyldyq mereıtoıy atap ótildi

Keshti ashqan QR Mádenıet mınıstri Muhtar Qul-Muhammed, M.Qarataev HH-shy ǵasyrdyń basyndaǵy qazaq ıntelıgentsııasynyń asa bir talantty ókili bolǵandyǵyn atap ótti. Qazaq zııalylary alǵash qýǵyn-súrginge ushyraı bastaǵan aýmaly-tókpeli zamanda M.Qarataev nebári 24 jasta bolǵan. Al 1938 jyldan bastap 1951 jylǵa deıin jalǵan aıyp taǵylyp, repressııanyń tyrnaǵyna ózi de iligedi.

«Úlken bedelge ıe bolyp, qazaqtyń Belınskııi atanǵan Muqań, halqyna, qazaq ádebıeti men mádenıetine sońǵy demi qalǵansha qyzmet istegen adam. Ol óte qarapaıym boldy. Túrmede kórgen qorlyqtary týraly jazǵan shyndyqty jazyp turyp, jarııalaýǵa qoryqty. El táýelsizdik alǵanyna - úsh-tórt aq jyl. Múmkin erten zaman qalaı bolyp ketedi dep qoryqqan da bolar. Sóıtip, túrmedegi dúnıelerin jeńgemizge amanat etip ketti: «Ýaqyt ótkennen keıin túbi bir shyǵararsyń, halyqqa kerek bolar», dep. Olardy men de júregim ezilip turyp oqydym. Muqań, óziniń halqyna barlyq bolmysymen, bitimimen, búkil shyǵarmashylyǵymen, danyshpandyǵymen, akademıktigimen jáne professorlyǵymen qaıtyp oraldy. Sol úshin Elbasynyń tapsyrmasy boıynsha aǵamyzdyń 100 jyldyq toıyn ótkizgeli otyrmyz», dedi mınıstr.

Mınıstrdiń aıtýynsha, Prezıdenttik mádenıet ortalyǵynda atap ótilip otyrǵan M.Qarataevtyń 100 jyldyǵy budan keıin, onyń týǵan jeri Qyzylordada jalǵasyn tabady. Sonymen birge, jazýshynyń mereıtoıy Qazaqstannyń birqatar joǵary oqý oryndarynda keńinen atap ótiletin bolady.

Eske alý keshte M.Qarataevtyń ómiri men shyǵarmashylyǵy jónindegi derekti fılmnen úzindiler kórsetildi. Onyń «Іzdenis izderi», «Sońǵy amanat» týyndylary negizinde teatrlandyrylǵan kórinister qoıyldy. QR eńbek sińirgen qaıratker Dúkenbaı Dosjan qazaqtyń aıaýly azamaty atanǵan tulǵa jaıly estelik sózimen bólisti.

M.Qarataev, Qazaqstan Jazýshylar odaǵy basqarmasynyń jaýapty hatshysy, tóraǵasy qyzmetterin atqarǵan. Qazaq sovet entsıklopedııasynyń bas redaktory bolǵan. Ol jeti júzden astam maqalanyń, qyryqtan astam kitaptyń avtory. Ǵylymı eńbekteriniń negizgi arqaýy - qazaq ádebıetiniń tarıhı joly men ósý satylary, týǵan eldiń topyraǵynan jaralyp, ana sútimen engen ulttyq dástúr, onyń jańa sapada qalyptasýy, túr men mazmunnyń bite qaınasyp, sheberliktiń shyńdalýy.