Astanada belgili músinshi Shoqan Tóleshtiń kórmesi ashyldy

Shara avtordyń shyǵarmashylyq eńbegine 35 jyl tolýyna arnalǵan.

"Búgingi mereıtoılyq kórmege 35 jumys usynylǵan. Budan da kóp eksponat ákelýge bolar edi, alaıda ár jyldary aǵashtan, qoladan, tastan jáne shynydan jasalǵan eń úzdik dúnıelerimdi ákelýdi sheshtim. Onyń sımvoldyq máni bar", - deıdi "QazAqparat" tilshisine bergen suhbatynda kórme avtory.

Shoqan Álmahambetuly Tólesh - QR Sýretshiler odaǵynyń múshesi, QR Óner akademııasynyń akademıgi, respýblıkalyq jáne halyqaralyq kórmelerge qatysýshy. Onyń aıtýly eńbegi retinde Nursultan Nazarbaevqa arnap Almaty qalasynda turǵyzǵan monýmentin ataýǵa bolady.

1992 jyldan bastap onyń jumystary álemniń kóptegen qalalarynyń galereıalaryna qoıylyp keledi, Qazaqstan, AQSh, Frantsııa, Belgııa, Italııa, Shveıtsarııa, Lıhtenshteın knıazdigi, Ulybrıtanııa, Avstrııa elderiniń jeke kolletsııalary men memlekettik murajaıynda saqtaýly.

Shoqan Tólesh - óz jumystarymen Batys pen Shyǵystyń stılıstıkasyn biriktirip, ónerdiń kórkem túrinen jańa plastıkalyq til oılap tapqan músinshi. Ol materıaldarǵa, ólshemderge batyl tájirıbe júrgizý arqyly ótken dáýir tarıhynyń tereń mán-maǵynasyn jańasha sıpattaýǵa qol jetkizdi. Osylaısha saq, ǵun, túrki kezeńderinen kele jatqan ata-baba dástúrin HHІ ǵasyrǵa saı etip kórsetti. Shoqan Tóleshtiń árbir jumysynan sýretshiniń armany men shalqar shabytyn baıqaýǵa bolady.