Astanada belgili qazaq jazýshysy jáne dramatýrg Dýlat Isabekovtiń 70 jasqa tolýyna arnalǵan shyǵarmashylyq kesh ótti

Elbasy Nursultan Nazarbaevtyń jazýshyǵa joldaǵan  quttyqtaý hatynda Almatyda jaqynda ótken «Isabaev álemi» halyqaralyq teatr festıvaliniń tabysty ótýi jáne jazýshy sheberligi kóptegen tamasha keıipkerler galereıasyn jasaǵany atap kórsetilgen. Prezıdent quttyqtaýyn QR Mádenıet jáne aqparat mınıstri Darhan Myńbaı oqyp berdi.

Sondaı-aq QR Parlamenti Májilisiniń tóraǵasy Nurlan Nyǵmatýlınnen, Premer-Mınıstr Serik Ahmetovten quttyqtaýlar kelip tústi. Olardy jınalǵandarǵa jazýshylar Aldan Smaıyl men Joltaı Almashev jetkizdi. Qazirgi qazaq prozasynyń aqsaqaly Ábdijámil Nurpeıisov  Dýlat Isabekovtiń shyǵarmalaryn ásirese  jastar qunyǵa oqyǵanyn atap ótti.

Dýlat Isabekov 1942 jyly 20 jeltoqsanda Ońtústik Qazaqstan oblysy, Saıram aýdanynda týǵan. Jazýshy, dramatýrg. Qazaq memlekettik ýnıversıtetin bitirgen (1966). Qazaq KSR Televızııa jáne radıohabar jónindegi memlekettik komıtetinde aǵa redaktor (1967-1968), Qazaq Sovet entsıklopedııasy bas redaktsııasynda aǵa ǵylymı redaktor (1968-1970), «Juldyz» jýrnalynda bólim meńgerýshisi (1971-1976), «Jalyn» baspasynda redaktsııa meńgerýshisi (1976-1980), Qazaq KSR Mádenıet mınıstrligi repertýarlyqredaktsııalyq kollegııanyń bas redaktory (1980-1988), Qazaq teledıdarynyń bas dırektory (1988-1992), «Jazýshy» baspasynyń dırektory (1992-1995), Qazaqstan Jazýshylar odaǵynyń hatshysy, QR Mádenıettaný ǵylymı-zertteý ınstıtýtynyń dırektory bolyp istegen. Qazir «Mádenıet» jýrnalynyń bas redaktory.

Alǵashqy áńgimesi «Jolda», «Zamandastar» atty jınaqta 1963 jyly jarııalandy. Keıin «Beket» (1966), «Aşy bal» (1969), «Mazasyz kúnder», (1970), «Qara shańyraq» (1973), «Tirshilik» (1975) povester men áńgimeler jınaqtary, «Qarǵyn» (1980) romany basyldy. Tańdamaly povesteri «Eki jıyrma» (1983) degen atpen jaryq kórdi. Birqatar shyǵarmalary orys tilinde aýdarylyp, «Polyn» (1978), «Otchıı dom» (1979), «Smıatenıe» (1986), «Novosele v starom dome» (1986) degen atpen basyldy. Jekelegen týyndylary vengr, nemis, polıak, cheh tilderinde jarııalandy.

«Rektordyń qabyldaý kúnderi» (1975), «Ápke» (1977), «Erteńdi kútý» (1979), «Muragerler» (1982), «Alystan kelgen ananas» (1984), «Kishkentaı aýyl» (1986), «Anasyn ańsaǵan qyz», «Eskertkish operatsııasy», «Eski úıdegi eki kezdesý», «Bonaparttyń úılenýi», «MuńlyqZarlyq», «Amal men aıla» t.b. pesalary respýblıkalyq, oblystyq teatr sahnalarynda qoıyldy. Tańdaýly pesalar jınaǵy «Jeti jelken» degen atpen 1987 jyly jaryq kórdi. Jekelegen týyndylary boıynsha «Gaýhar tas» (rej. Sh.Beısembaev, 1975), «Dermene» (rej. A.Áshimov, 1986), «Taýqymet» (rej.U.Qoldaýova) kórkem fılmderi túsirildi.

Qazaqstan Jazýshylar odaǵynyń M.Áýezov atyndaǵy syılyǵynyń (1985, «Muragerler» pesasy úshin), QR Memlekettik syılyǵynyń (1992), Halyqaralyq PEN klýb, Platınaly «Tarlan» syılyqtarynyń laýreaty (2006).