Astanada «Belasar» kópiriniń astynda jańa demalys aımaǵy paıda boldy

NUR-SULTAN. QazAqparat - Nur-Sultanda L. Gýmılev atyndaǵy Eýrazııa ulttyq ýnıversıtetiniń janyndaǵy kópir astynda jańa qoǵamdyq keńistik jasaldy, dep habarlaıdy QazAqparat.

Bul jaıynda qala ákimi Altaı Kólginov óziniń Instagram paraqshasynda jazdy.

«Taǵy bir kópir astyndaǵy keńistik Eýrazııa ulttyq ýnıversıtetiniń janynan ashyldy» dep jazdy shahar basshysy.

«Belasar» kópiriniń astynda ornalasqan aımaqta strıtbol, konkı, ústel tennısi jáne jattyǵý alańdary bar.

Elorda ákimdigi qala turǵyndarynyń demalysy úshin qolaıly jaǵdaı jasaýǵa aıryqsha kóńil bólip otyr. Osylaısha bos jatqan jerler úlken alańǵa, shaǵyn saıabaqtar men jaıly býlvarlarǵa aınaldy.

Bıyl 50 qoǵamdyq oryn jáne 150 aýla jabdyqtalady. Bul jumys «Nur-Sultan – jaıly qala» bas jospary tujyrymdamasy aıasynda iske asady.

Eske sala ketsek, buǵan deıin elordadaǵy «Arqar» kópiriniń astyndaǵy aýmaqta demalys aımaqtary keńeıtilip, olar jańa graffıtımen tolyqtyrylǵan. Óner týyndylaryn Qazaqstannyń ár qalalarynan kelgen daryndy sýretshiler salǵan. «Arqar» kópiriniń astyndaǵy keńistik Trıatlon jáne Prezıdent saıabaqtaryn biriktirdi.