Astanada Beket ata Myrzaǵululynyń 260 jyldyǵy atalyp ótti
ASTANA. Qyrkúıektiń 13-i. QazAqparat - Keshe, qyrkúıektiń 12-si kúni, Astanada Beket ata Myrzaǵululynyń 260 jyldyǵy atalyp ótti, dep habarlaıdy QazAqparat.
Beket ata 1750 jyly qazirgi Atyraý oblysy, Jylyoı aýdanynyń aýmaǵynda, Jem ózeniniń boıyndaǵy Aqmeshit degen jerde týǵan. Eldi qorǵaýda, ıslam dinin nasıhattaýda alatyn orny erekshe.
Aıta ketý kerek, Beket ataǵa arnalǵan osyndaı sharalar buǵan deıin Atyraý oblysynda, Almaty qalasynda bolyp ótti. Astana qalasyndaǵy «Turan» meıramhanasynda Beket atanyń rýhyna arnalyp quran oqylyp, as berildi.
Jazýshy, Memlekettik syılyqtyń ıegeri Ánes SARAI Beket ata týraly oı tolǵap, onyń qazaq tarıhyndaǵy róli, eldi qorǵaýdaǵy erligi, ımandylyq jolyndaǵy ıgi isteri, áýlıelik qasıetteri jóninde áńgimelep berdi. Senator Orynbaı Rahmanberdıev bul shara úsh júzdiń basyn qosqan oqıǵa boldy dep atap ótti. Májilis depýtaty Zeınolla Alshymbaev aldaǵy aptada Beket atanyń 260 jyldyǵy Mańǵystaý óńirinde atalyp ótetinin aıta kelip: «Beket ata fenomeni áli de zertteledi. Jumyr basty pendeniń barlyǵy birdeı áýlıeniń qasıetterin túsine qoıýy qıyn. El basyna kún týǵan zamanda elin qorǵaǵan, qazaq jurtyna pana bolǵan, ádil sózin aıtqan Beket ata halqymen birge jasaı beredi»,-dedi.
Osy basqosýda Beket atanyń ómiri men halqymyzǵa jasaǵan ólsheýsiz eńbegi týraly «Túrki álemi» telestýdııasy shyǵarǵan derekti fılm kórsetildi.
Búgingi tańda sazgerler Beket ataǵa arnalǵan án-kúılerdi shyǵaryp jatyr. Aqyndardyń jazǵan óleńderi de az emes. Sonyń biri - belgili kúıshi, Qazaqstan Respýblıkasyna eńbeń sińirgen qaıratkeri Shámil Ábiltaev «pir Beket» atty kúı shyǵarǵany málim. Bul kúıdi jınalǵandar aldynda Qazaqstan Respýblıkasynyń mádenıet qaıratkeri, dombyrashy Janǵalı Júzbaı oryndady.
Dombyrashy Baqytjan Dúısenǵazy Abyldyń kúıin tartty, ánshi-termeshiler Aıgúl Elshibaeva men Núrken Telman halyqtyń júreginen oryn alǵan termelerdi naqyshyna keltire shyrqady.
Beket ata qorynyń múshelerine, Astanadaǵy sharany uıymdastyrýshylardyń jetekshisi Igilik Qılybaıulyna rızashylyqtaryn jetkizdi.
Osy jıynnyń qorytyndysynda bes ata urpaǵynyń ıyqtaryna shapan jabylyp, jaınamaz tabys etildi. Asqa kelgen ár adamǵa tábárik berildi.
