Astanada bazar mańynan áıeldiń denesi tabyldy
ASTANA. KAZINFORM — Elordada bazar mańynan 47 jastaǵy áıeldiń denesi tabyldy. Astana polıtsııa departamenti men Qoǵamdyq densaýlyq saqtaý basqarmasy oqıǵaǵa qatysty túsinikteme berdi.
Qaıǵyly jaıt 7 qazan kúni keshki ýaqytta bolǵan. Oqıǵa ornynan túsirilgen vıdeo áleýmettik jelilerde tarady.
Astana polıtsııa departamentiniń málimetinshe, áıeldiń denesi saýda bazarynyń aldynda tabylǵan. Denesinde zorlyq-zombylyq belgileri baıqalmaǵan.
— Aldyn ala málimet boıynsha, áıeldiń jaǵdaıy nasharlap, jedel medıtsınalyq járdem brıgadasy kelgenge deıin qaıtys bolǵan. Qazirgi ýaqytta tergeý júrgizilip jatyr, — dep habarlady polıtsııanyń baspasóz qyzmeti.
Al Astananyń qoǵamdyq densaýlyq saqtaý basqarmasy oqıǵa ornyna kelgen medıtsına qyzmetkerleri áıeldi óli kúıde tapqanyn jáne bıologııalyq ólimdi tirkegenin málimdedi.
Marqumnyń denesi polıtsııa qyzmetkerlerine tapsyryldy.
Aıta keteıik, buǵan deıin Astananyń 30 jastaǵy turǵyny óltirilgennen keıin tórt polıtsııa qyzmetkeri jumysyna salǵyrt qarady degen kúdikpen ustalǵanyn jazǵanbyz.
