Astanada Baıtursynuly kóshesi eki aptaǵa jabylady
ASTANA. 25 mamyr. QazAqparat - Astanada 26 mamyrdan bastap A. Baıtursynuly kóshesiniń Obaǵan jáne Mırzoıan kósheleri aralyǵyndaǵy bóligi jabylady.
Bul týraly qalalyq Jolaýshylar kóligi jáne avtomobıl joldary basqarmasynan málim etti.
Vedomstvonyń málimeti boıynsha, Baıtursynuly kóshesindegi atalǵan jol telimi eki aptaǵa (10 maýsymǵa deıin) jol-qurylysy jumystarynyń júrgizilýine baılanysty jabylady.
«Osyǵan oraı qalalyq №3 jáne №21 avtobýs baǵdarlary myna syzba boıynsha: «Obaǵan kóshesi - Qoshqarbaev dańǵyly (ońǵa qaraı) - Sarykól kóshesi (solǵa qaraı) - odan ári burynǵy baǵdar boıynsha júredi. Keri baǵyt osy atalǵan syzba boıynsha júzege asyrylady», - delingen habarlamada.
astana.kz saıtynyń jazýynsha, bıylǵy jyly elordada 17 kósheni jóndep, 115 shaqyrym joldy qalpyna keltirý josparlanǵan. Onyń 40 shaqyrymy jańadan salynyp, 35,6 shaqyrymy jańartylatyn bolady. Sondaı-aq turǵyn úı aýlalarymen jalǵasatyn 21,8 shaqyrym joldyń qurylysy aıaqtalady.
