Astanada Báıterek mańynda shampan shashqan blogerge aıyppul salyndy
ASTANA. KAZINFORM — Elordada bloger qoǵamdyq orynda qoqys qaldyrǵany úshin jazalandy, dep habarlaıdy qalalyq ákimshilik quqyq buzýshylyqtar jónindegi mamandandyrylǵan aýdanaralyq sottyń baspasóz qyzmeti.
Sot azamatsha M.-ǵa qatysty ortaq paıdalanylatyn oryndy lastaý faktisi boıynsha (ÁQBtK-niń 434-2-babynyń 1-bóligi) ákimshilik isti qarady.
2026 jylǵy 27 sáýirde shamamen saǵat 01:00–de azamatsha M. Astana qalasyndaǵy Nurjol kóshesinde, «Báıterek» monýmenti mańynda qoǵamdyq orynda bola turyp, shampan bótelkesin ashyp, ishindegisin jerge tókken. Osylaısha ol ortaq paıdalanylatyn oryndy lastaǵan.
Sot otyrysynda azamatsha M. óz kinásin tolyq moıyndap, jasaǵan áreketine ókinetinin bildirdi. Ol bloger retinde «Báıterek» monýmentiniń aınalasynda trendtegi beınerolık túsirgisi kelgenin, keıin lastaǵan jerin jınap ketkenin túsindirdi.
Quqyq buzýshylyq faktisi azamatsha M.-nyń kinásin moıyndaý týraly túsiniktemelerimen, ınspektordyń raportymen, ákimshilik quqyq buzýshylyq týraly hattamamen, sondaı-aq «Instagram» áleýmettik jelisinde jarııalanǵan oqıǵa ornynan túsirilgen beınejazbamen dáleldendi.
Ákimshilik jaza taǵaıyndaý kezinde sot kináni moıyndaýdy jáne shyn júrekten ókinýdi jeńildetetin mán-jaılar retinde eskerdi. Aýyrlatatyn mán-jaılar anyqtalǵan joq. Sot qoǵamdyq jumystar quqyq buzýshylyq jasaǵan tulǵanyń kelisimi bolǵan jaǵdaıda ǵana taǵaıyndalatynyn da eskerdi.
— Azamatsha M. qoǵamdyq jumystarǵa tartýǵa kelispegendikten, sot ony kináli dep tanyp, 10 AEK mólsherinde, ıaǵnı 43 250 teńge aıyppul túrindegi ákimshilik jaza taǵaıyndady. Sot qaýlysy zańdy kúshine engen joq, — delingen habarlamada.
Buǵan deıin «Báıterekke» qurmetsizdik tanytqan astanalyq qamaýǵa alynǵanyn jazǵanbyz.
