Astanada baılar klýbynyń fılıaly ashyldy
ASTANA. 18 qyrkúıek. QazAqparat - Astanadaǵa halyqaralyq baılar klýbynyń fılıaly ashyldy. Bul júıe óz múshelerine elıtalyq qyzmetter alýǵa, máselen, mıgratsııadan bastap, ǵaryshqa ushýǵa deıingi qyzmetterdi joǵary deńgeıde jasaýǵa kómektesedi.
Bul týraly «Ekspress K» gazeti búgingi sanynda jarııalanǵan «Neskromnoe obaıanıe býrjýazıı» atty maqalasynda jazady.
Klýb AQSh-ta VIP-tulǵalarǵa qyzmet kórsetý úshin qurylǵan bolatyn. Onda baılyǵyna qaraı tórt deńgeı qalyptasqan. Alǵashqy deńgeıge 100 myńnan 1 mln. dollarǵa deıingi aktıvi barlar jatady. Al eń joǵary deńgeıge 15 mln. dollardan asatyn baılyq ıeleri kiredi.
Eń qyzyǵy, baılarǵa arnalǵan klýbtyń eń negizgi qyzmeti - baılarǵa únemdeýge kómektesý. Klýb múshelerine qonaq úılerde prezıdenttik nómirlerdi brondaýda, ıahta men ushaqtardy jaldaýda, álemdegi eń tanymal meıramhanalarda ústeldi daıyndap qoıýda, shańǵy kýrortynda demalýda jáne taǵy basqa kóptegen qyzmetterde jeńildikter qarastyrylady.
Sondaı-aq, tek klýb músheleri ǵana stratosferaǵa jeńildikpen ushý quqyǵyna ıe bolady. Jáne olar Bagam araldarynyń kóshi-qon zańdaryn jaqsy biletin ákki zańgerlermen, sáýletti saraılar men dáýletti qamaldardy qoldan-qolǵa ótkizip úırengen rıeltorlarmen tanysa alady.
