Astanada baılanys salasynyń qyzmetkerleri memlekettik tilden bilim jarystyrýda
ASTANA. Qyrkúıektiń 30-y. QazAqparat /Jasulan Amanbaıuly/ - Elordada Qazaqstan halqy tilderi festıvali aıasynda baılanys salasynyń qyzmetkerleri arasynda «Memlekettik til - el birliginiń tiregi» atty baıqaý ótýde.
Baıqaý QR Baılanys jáne aqparat mınıstrliginiń bastamasymen telekommýnıkatsııa, baılanys salasynda memlekettik tildiń qoldanylý aıasyn keńeıtý jáne Konstıtýtsııaǵa sáıkes qazaq tiliniń memlekettik til retindegi mártebesin joǵarylata túsý maqsatynda jasalyp otyr.
«Qazposhta», «Qazaqtelekom» kompanııalary jáne Qazaqstandaǵy baılanys operatorlary qyzmetkerlerinen quralǵan 11 komanda «Eń úzdik ujym» atalymy boıynsha qazaq tilinen saıysqa túsetin bolady.
Baılanys salasy - bul bolashaqtyń salasy. Telekommýnıkatsııa syndy ınnovatsııalyq salada qazaq tiliniń jaǵdaıyna úlken mán beriledi», deıdi ádilqazylar alqasynyń múshesi, QR Parlamenti májilisiniń depýtaty Qaırat Sádýaqasov.
Onyń aıtýynsha, uıaly baılanys pen kommýnıkatsııalyq kompanııalar qyzmet berý salasynyń kóshbasshylary bolyp tabylady. Sondyqtan olardyń qyzmetkerleri tek orys tilinde ǵana emes, memlekettik tildi de erkin meńgerýi tıis.
Baıqaýda árbir ujym qazaq tilinde sahnalanǵan qoıylym qoıyp, ózderiniń qyzmeti týraly áńgimelep berýi tıis. Shara kezeńderiniń birinde ulttyq qıim úlgilerin kórsetedi.
Shara barysynda qatysýshy kompanııalardyń kúshimen uıymdastyrylǵan kórme ashyldy. Onda baılanys salasyndaǵy oryssha-qazaqsha sózdikter usynyldy jáne kompanııalardyń qazaq tiliniń qoldanylý aıasyn keńeıtý baǵytynda jasap jatqan naqty is-qadamdary jóninde maǵlumattar berilgen.
