Astanada Baýyrjan Nógerbek murasyna arnalǵan halyqaralyq forým ótip jatyr

ASTANA. QazAqparat – Búgin Qazaq ulttyq óner ýnıversıtetinde elimizdegi kásibı kınotanýdyń negizin qalaǵan ǵalym Baýyrjan Nógerbektiń 75 jyldyǵyna arnalǵan halyqaralyq forým bastaldy, dep habarlaıdy QazAqparat tilshisi.

Forým Qazaq ulttyq óner ýnıversıtetiniń 25 jyldyq mereıtoıy aıasynda uıymdastyryldy.

«Baýyrjan Nógerbek murasy: teorııa, syn jáne kınopedagogıka» atty shara aıasynda zııaly qaýym ókilderi professor Baýyrjan Nógerbek murasynyń búgingi kınoúrdis pen kınotaný salasyndaǵy mańyzy, onyń urpaq tárbıesi jolyndaǵy eren eńbekteri týraly sóz qozǵady.

Otandyq jáne sheteldik kınotanýshylar men kınematografıster óz pikirlerin ortaǵa saldy.

«Biz 1976 jyldan bastap Baýyrjanmen kıno salasynda birge jumys istedik, otbasymyzben aralastyq. Baýkeń azamat retinde de, maman retinde de erekshe tulǵa edi. Kınotaný degendi – ulttaný dep aıtýǵa bolady. Baýyrjan da kınodaǵy ulttyq bolmystyń kórinýine erekshe nazar aýdaratyn. Qazaq kınosyn tanytýda onyń eńbegi zor. Qazaq kınosy týraly aıtý degenimiz - qazaq týraly aıtý degen sóz, qazaqtyń taǵdyry týraly aıtý degen sóz. Baýkeń árqashan osy ustanymǵa erekshe berik boldy. Onyń myqtylyǵyn eki nárseden kórýge bolady, birinshi Baýkeńniń shákirtteri myqty edi. Onyń mektebin kórgen jastar búgin úlken bıikterdi baǵyndyryp júr. Ekinshi onyń ákelik qasıeti, tárbıesi balalaryn myqty tulǵa etip qalyptastyrdy», - deıdi jazýshy Smaǵul Elýbaı.

Baýyrjan Nógerbektiń áriptesi bolǵan jazýshysy, dramatýrg Roza Muqanova ǵalymnyń ult bolashaǵy jolynda úlken arman arqalaǵanyn aıtady.

«Baýyrjan Nógerbek meniń uǵymymda rýhanııattyń úlken qaıratkeri, kıno salasyndaǵy úlken tulǵa. Ol kisiniń boıynda úlkenderdiń mektebin kórgen, tárbıesin alǵan erekshe qasıeti menmundalap turatyn. Oqý ornyna ustazdyq etýge úlken tulǵalardy tarta bildi. Onyń ózi bolashaqtaǵy úlken mamandardy tárbıeleýdegi arly, arda maqsaty edi. Ol kisiniń shákirttermen qarym-qatynasynyń ózi erekshe bolatyn. Jastarǵa senim artyp, jastardyń pikirin tyńdaı biletin. Óziniń armany kınodaǵy ulttyq kelbetti kórsetiý boldy. Baýkeń kınotanýshy ǵalym retinde qazaq kınosyna úlken úles qosty, zertteýleri kınotaný ǵylymy úshin úlken olja saldy», - dedi Roza Muqanova.

Sondaı-aq, forým aıasynda qazaq kınosynyń belgili sheberleri – kınorejısserler Dárejan Ómirbaev pen Bolat Qalymbetovtiń fılmderi kórsetilip, sheberlik dáristeri ótedi. Sonymen birge kınotanýshy, ónertaný doktory Gúlnar Ábikeevanyń sheberlik dárisi josparlanýda.