Astanada Baýyrjan Momyshulynyń 103 jyldyǵyna oraı saltanatty mıtıng ótti
Jıynǵa kelgen QR ardagerler uıymynyń ókilderi, jas sportshylar - olımpıadalyq rezervtiń músheleri, «Jas Otan» jastar qanaty, elorda turǵyndary eske alý mıtıngisinen keıin batyr baba - Baýyrjan Momyshulynyń eskertkishine gúl shoqtaryn qoıdy.
Baýkeńniń murasyn belsendi nasıhattap júrgen Aýǵan soǵysynyń ardageri, QR Parlamenti májilisiniń depýtaty Baqytbek Smaǵuldyń aıtýynsha, B.Momyshuly sııaqty úlgi tutar tulǵalar máńgilik áspettelýi tıis. Ol jastardyń, keıingi urpaqtyń tulǵalyq etalony bolyp qalýy kerek.
«Táýelsiz memleket esebinde úlkenimiz, kishimiz de táýelsiz sana qalyptastyrýda táýelsiz tulǵa kerek. Ol tulǵa - Baýyrjan Momyshuly. Búgingi tańdaǵy patrıotızmniń irgesin qalaǵan, ómiri ónegeli, artynda óshpes murasy bar - osyny myna biz, aǵa býyn ýystan ýysqa keıingi urpaqqa daryta, tarata bilýimiz kerek», - deıdi Baqytbek Smaǵul.
Aıta keteıik, dál osy kúni 103 jyl buryn (1910-1982) dańqty qolbasshy, áskerı qaıratker, jazýshy, Keńes Odaǵynyń Batyry, Qazaqstan Respýblıkasy Memlekettik syılyǵynyń laýreaty Baýyrjan MOMYShULY dúnıege keldi.
Jambyl oblysy Jýaly aýdanynda týǵan. Lenıngrad qarjy akademııasy janyndaǵy kýrsty, Keńes Armııasy Bas Shtabynyń janyndaǵy Joǵary áskerı akademııany bitirgen.
1936 jyly Qyzyl Armııa qataryna alynyp, vzvod, rota komandıri, polk shtaby bastyǵynyń kómekshisi, Qazaq áskerı komıssarıatynyń nusqaýshysy bolǵan. Otan soǵysy bastalysymen 316-shy atqyshtar (keıinnen 8-shi gvardııa) dıvızııasynyń jasaqtalýyna belsene qatysyp, sol dıvızııa quramynda maıdanǵa attanǵan. Máskeý túbindegi urystarǵa qatysyp, Panfılov atyndaǵy 8-shi gvardııalyq dıvızııa batalonynyń, polkiniń komandıri bolǵan. 1944-1945 jyldary osy dıvızııany basqarǵan. Onyń soǵys kezindegi urys júrgizýdegi áskerı sheberligi, tapqyrlyǵy men jeke basynyń eren erligi erekshe kózge túsip, batyrlyq dańqy ańyzǵa aınalǵan.
Batyrdyń qalamynan týǵan kórkem shyǵarmalar birneshe shetel tilderine aýdarylǵan. Ol týyndylaryn orys-qazaq tilinde birdeı jazǵan. Onyń «Bizdiń semıa», «Ushqan uıa», «General Panfılov», «Kýba áserleri», «Moskva úshin shaıqas», «Maıdan», «Tólegen Toqtarov» atty kitaptary bar.
Sonymen qatar batyrdyń qaharmandyq erligi týraly orys jazýshysy Aleksandr Bektiń «Volokolamsk tas joly» atty povesi, Ázilhan Nurshaıyqovtyń «Aqıqat pen ańyz» atty roman-dılogııasy, Mekemtas Myrzahmetulynyń «Baýyrjan Batyr» atty kitaby, Maǵıra Qojahmetovanyń «Tosyn syr-suhbat»atty pesalary jaryq kórip, jazýshy-dramatýrg Elen Álimjannyń «Polkovnıktiń jarııalanbaǵan jazbalary» pesasy qoıyldy. «Qazaqfılm» kınostýdııasy «El basyna kún týsa» atty kórkem fılm túsirdi. Moskva akademııalyq drama teatry Baýyrjan Momyshuly týraly «Volokolamsk tas joly» spektaklin qoıdy. 2001 jyly Baýyrjantaný ǵylymı zertteý ortalyǵy ashylǵan. Batyrǵa týǵan jerinde, Astana qalasynda eskertkishter qoıylyp, Máskeý oblysy Volokolamsk qalasynda batyrdyń tas músini ornatyldy.
Batyr esimi aýyldarǵa, kóshelerge, respýblıkalyq áskerı balalar mektebine berilgen.
Qyzyl Tý, Eńbek Qyzyl Tý, Halyqtar Dostyǵy, 1-dárejeli Otan soǵysy, 2 ret Qyzyl Juldyz, «Qurmet belgisi» ordenderimen jáne medaldarmen marapattalǵan.
