Astanada baýyr men búırekti shuǵyl aýystyrý operatsııasy sátti ótti
ASTANA. 9 tamyz. QazAqparat - Astanada baýyr men búırekti shuǵyl aýystyrý boıynsha kúrdeli operatsııa sátti ótti. Bul týraly astana.kz saıtyna Respýblıkalyq jedel medıtsınalyq járdem ǵylymı ortalyǵynan habarlady.
Ortalyq jol aýrýhanasynyń jáne Respýblıkalyq jedel medıtsınalyq járdem ǵylymı ortalyǵynyń joǵary bilikti dárigerleriniń úılesimdi jumysynyń arqasynda 15 jasar qyz balaǵa, 45 jastaǵy er adamǵa jáne 28 jastaǵy boıjetkenge shuǵyl túrde ota jasaldy.
«6 tamyzda saǵat 23.00-de Ortalyq jol aýrýhanasynyń dárigerleri mı qan aınalymynyń jiti buzylýy dıagnozymen 45 jastaǵy áıel adamnyń qaıtys bolǵanyn belgiledi. Marqumnyń jaqyn týystary aǵzalardy alýǵa kelisimderin berdi. Ortalyq jol aýrýhanasynyń jáne Respýblıkalyq jedel medıtsınalyq járdem ǵylymı ortalyǵynyń 12 dárigerinen quralǵan brıgada 10 saǵat boıy eki ota jasady. Bılıarlyq tsırroz dıagnozy qoıylǵan 15 jastaǵy qyz balanyń baýyry aýystyryldy. Budan basqa, dárigerler 45 jastaǵy er adamdy da shuǵyl túrde baýyryn transplantatsııalaýǵa daıyndady. Alaıda, ekinshi búırekke tıisti retsıpıent Astanadan bolmaı shyqty. Qyz bala Mańǵystaý oblysy Aqtaýdan birinshi ushaqpen Astanaǵa ushyp keldi, 6 saǵattan soń RJMJ ǴO dárigerleri oǵan ota jasady», - deıdi dárigerler.
Bıyl RJMJ ǴO mamandary Ortalyq jol aýrýhanasyndaǵy áriptesterimen ekinshi ret birlesip qyzmet etti. Birlesken jumys pen birinshi aýystyryp qondyrýdyń nátıjesi - jetistiktiń aıǵaǵy. Sol kezde 51 jastaǵy áıel adamǵa marqumnyń jubaıynyń ruqsatymen máıit donorynan baýyr aýystyryp qondyryldy. Qazir retsıpıent ózin jaqsy sezinedi.
«Osy ispettes operatsııalardy júrgizýdiń barysyn josparlanǵan dep ataýǵa bolmaıdy. Shyndyǵynda, bul - shuǵyl sharalar. Patsıenttiń mı ólimin belgilegennen soń dárigerler onyń týystarynan basqa adamnyń ómirin saqtap qalýlaryn suraıdy. Ruqsat alý - transplantologııadaǵy eń kúrdeli kezeń», - deıdi dárigerler.
