Astanada baýkespe ury óziniń áreketin vıdeoǵa túsirip otyrǵan
ASTANA. QazAqparat - Elordada polıtseıler bir túnde 5 urlyq jasady degen kúdikpen Aqmola oblysynyń 28 jastaǵy turǵynyn ustady, dep habarlaıdy QazAqparat Astana ІІD baspasóz qyzmetine silteme jasap.
Qylmystyq polıtsııa qyzmetiniń aqparatyna qaraǵanda, mashına salonynan zat urlaýǵa qunyqqan kúdikti bir stsenarıı boıynsha áreket etken - jábirlenýshilerdiń avtomobıliniń qulpyn buzyp kirip, salondaǵy avtomagnıtolalardy, kólik ıeleriniń jeke buıymdaryn, t.b. qoldy etken.
«Urlyqtyń bári túngi eki men tańǵy bestiń aralyǵynda bolǵan. Ol kez kelgen markadaǵy kólikti tonaıtyn bolǵan», - delingen habarlamada.
Kúdikti óziniń áreketin telefonymen vıdeoǵa túsirip otyrǵan.
«Er adam urlyq jasaýmen shektelmeı, mashınaǵa barynsha zalal keltirýge tyrysyp, salondaǵy detaldardy syndyra bergen», - deıdi polıtseıler.
10 qyrkúıekte kúdikti ustaldy, budan tys, onyń áreketteri vıdeobaqylaý kameralaryna da túsip qalǵan. Belgili bolǵanyndaı, ol buǵan deıin de «tonaý» baby boıynsha qylmystyq jaýapqa tartylǵan eken.
Er adam tergeý kezinde bes urlyq faktisi boıynsha aıybyn moıyndaǵan. Tárkilengen buıymdar ıelerine qaıtaryldy.
Kúdikti ІІD tergeý ızolıatoryna jiberildi. QR Qylmystyq kodeksiniń 188-baby, 2-bóligi boıynsha sotqa deıingi tergep-tekserý sharalary júrip jatyr. Sondaı-aq polıtseıler kúdiktiniń qala aýmaǵyndaǵy osy taqylettes basqa qylmystarǵa qatysynyń bar-joǵyn tekserip jatyr.
