Astanada Baýyrjan Momyshuly týraly jańa qoıylymnyń premerasy ótedi

ASTANA. KAZINFORM — 7-8 jeltoqsan kúnderi elordadaǵy Qalıbek Qýanyshbaev atyndaǵy Qazaq ulttyq mýzykalyq drama teatrynda «Momyshuly» derekti dramasynyń premerasy ótedi.

Astanada Baýyrjan Momyshuly týraly jańa qoıylymnyń premerasy ótedi
Foto: Q.Qýanyshbaev atyndaǵy qazaq ulttyq mýzykalyq drama teatry

Qart Baýyrjan men jas jýrnalıstiń suhbaty — qoıylymnyń negizgi arqaýy. Úsh býynnyń kózqarasy toǵysqan týyndyda batyrdyń ótken ómiri men ishki álemi ashylady. Spektaklde Momyshuly týraly buryn jarııalanbaǵan derekter kórermen nazaryna usynylady.

Qazaqstannyń eńbek sińirgen qaıratkeri, teatr jáne kıno akteri Baqyt Baqtanuly qoıylymnyń Instagram paraqshasynda jarııalanǵan beınejazbada týyndynyń dúnıege kelýine batyrdyń boıyndaǵy asyl qasıetter túrtki bolǵanyn aıtty. 

— Eń birinshi túrtki — bizdiń Baýyrjan atamyzdaı uly tulǵanyń tula boıyndaǵy asyl qasıetter shyǵar. Óziniń eline, Otanyna, halqyna degen mahabbaty, ol kisiniń ar, namys, ojdan degen uly uǵymdy ómir boıy tý etip ótkeni shyǵar dep oılaımyn, — dedi akter.

Baqyt Baqtanuly er azamattyń el aldyndaǵy boryshy týraly oı qozǵap, batyrdyń ar men namys jaıly aıtqan sózderin mysalǵa keltirdi.

— Jalpy Baýyrjan atamyz aıtady: «Keshkisin jastyqqa basyńdy qoıar aldynda aryń, ojdanyńnyń aldynda esep bere alsań, mine, naǵyz baqyt sol» deıdi. Sol sebepti eger biz árqaısymyz ózimizdiń istegen isterimizdiń aldynda esep bere alsaq, ol rasynda da úlken bir baqyt shyǵar, — dedi Baqyt Baqtanuly.

Qoıylymnyń stsenarıı avtory — Nazgúl Sarybaı, qoıýshy rejısseri — Juldyzbek Jumanbaı, prodıýseri — Qýanysh Qonysbek.

Baýyrjan Momyshulynyń rólin Baqyt Baqtanuly men Baýyrjan Eskojanuly somdaıdy. Batyrdyń jas kezin Qýanysh Aıdaruly, Jambyl Jabaevtyń rólin Dosjan Abderaımuly oınaıdy.

Eske salaıyq, byltyr Baýyrjan Momyshulynyń 115 jyldyǵyna oraı Ortalyq memlekettik arhıvte batyrdyń ómiri men qyzmetine qatysty buryn belgisiz bolǵan qujattar kórmege qoıylǵan edi.