Astanada Baýbek batyrdyń erligi dáripteldi
ASTANA. QazAqparat - Kenesary bastaǵan ult-azattyq kóterilis tizginshileriniń biri, hannyń senimdi serigi Baýbek batyrǵa arnalǵan «Batyrlar rýhy» atty is-shara ótti, dep habarlaıdy QazAqparat tilshisi.
Batyr qurmetine uıymdastyrylǵan sharada ol týraly týyndylar men arnaıy beınetaspa kórsetildi.
Eske alý sharasynyń maqsaty - jastar jyly aıasynda táýelsizdik úshin kúresken, aty ańyzǵa aınalǵan batyrlarymyzdyń esimin dáriptep, qadirleý.
«Kenesary hannyń sarbazdary» atty úlken qozǵalys bar. 1837-1847 jyldardaǵy ult-azattyq kóteriliste Kenesary óz áskerimen Aqmola bekinisin basyp aldy. Sol patsha ókimetine qarsy qozǵalysqa qatysqan sarbazdardyń ishinde meniń arǵy atam, arǵyn rýynan taraıtyn Qaraýyl Bekmyrza balasy Baýbek te bar. Ol 12 jasynan Kenesarynyń qolynda ósip, sonyń tárbıesin kórgen. Keıin batyrmen birge kóteriliske qatysyp, sońyna deıin júrgen. Qozǵalys jeńilispen aıaqtalǵan soń atamdy Reseıdiń Túmen qalasyna jer aýdaryp, ol sol jaqta qaıtys boldy», - deıdi batyr urpaǵy Qabıbolla Shaıahmetov.
Onyń aıtýynsha, ótken jyly Baýbek batyrdyń týǵan jeri Aqmola oblysy, Qıma jerinde as berilip, odan bólek aǵartý sharalary uıymdastyrylǵan.
«Byltyr Baýbek batyrdyń qurmetine ǵylymı konferentsııa ótkizildi. Bıyl atalǵan sharalar óz jalǵasyn tabady. Sonyń biri búgingi shara, mundaǵy maqsatymyz búgingi urpaq, el úshin kúresken batyrlardyń esimin umytpasa eken. Sol úshin de biz batyrlardyń el qorǵaýdaǵy erligin jastar arasynda nasıhattaýdamyz», - dedi ol.
Elordadaǵy Ortalyq balalar jáne jasóspirimder kitaphanasynda ótken sharaǵa mektep oqýshylary men kitaphana qyzmetkerleri qatysty. 
