Astanada Batys Qazaqstan jáne Atyraý oblystarynyń kúnderi ótedi
ASTANA. QazAqparat - Elordada «Qýatty óńir - qýatty Qazaqstan» aktsııasy aıasynda óńirler kúnderi jalǵasady. 17-18 qyrkúıekte «Han shatyr» SOO janynda Batys Qazaqstan jáne Atyraý oblystarynyń taýar óndirýshileriniń jármeńkeleri ótedi. Sonymen qatar, bul kúnderi óńirlerdiń mádenı sharalary da uıymdastyrylady, dep habarlaıdy qala ákimdiginiń saıty.
Batys Qazaqstan oblysynyń aýyl sharýashylyq jármeńkesine 12 aýdan men Oral qalasynyń kásipkerleri qatysady. Jármeńkede 200 tonnadan astam kókónis, et, konservi, un jáne makaron ónimder, bal, balyq, sýsyn jáne t.b. satylady. Beıbitshilik jáne kelisim saraıynda Batys Qazaqstan oblysynyń tarıhı-ólketaný murajaıynyń «Aqjaıyq arý mekenim» taqyryptyq kórmesi kópshilik nazaryna usynylady. 18 qyrkúıekte saǵat 16.00-de Dáýletkereı atyndaǵy qazaq halyq aspaptary orkestriniń, Batys Qazaqstan oblysy ákiminiń estradalyq-sımfonııalyq orkestriniń, «Nazerke», «Aqjaıyq» bı ansamblderiniń jáne t.b. óner ıeleriniń qatysýymen gala-kontserti ótedi.
Atyraý oblysynyń aýyl sharýashylyq jármeńkesine 34 taýar óndirýshi qatysyp, jalpy kólemi 90 tonna ónim shyǵarylady. Astanalyqtarǵa balyq, kókónis, sút jáne et ónimderi, shujyq ónimderi, jumyrtqa usynylady.
Jármeńke kezinde oblystyń shyǵarmashylyq ujymdarynyń qatysýymen kontserttik baǵdarlama ótedi.
17 qyrkúıekte saǵat 18.00-de Beıbitshilik jáne kelisim saraıynyń foıesinde Atyraý oblystyq tarıhı-ólketaný murajaıynyń «Ǵasyrlardan syr shertken Atyraý» atty kórmesi uıymdastyrylady.
Atalǵan kórmege orta ǵasyrlyq Saraıshyq qalashyǵynan tabylǵan arheologııalyq buıymdar, tarıhı tulǵalardyń muraǵattyq qujattary men jeke zattaı jádigerleri shyǵarylady. Etnografııalyq turmystyq buıymdar, qolóner sheberleriniń týyndylary, aǵash ydystar, zergerlik áshekeı buıymdary jurtshylyq nazaryna usynylady.
Sonymen qatar, saǵat 19.00-de Beıbitshilik jáne kelisim saraıynda Atyraý oblysy ónerpazdarynyń gala-kontserti ótedi. Sahna tórinde «Іnjý-Marjan», «Mahambet», «Jem Arýy», «Shynarym-aı» bı ujymdary, «Murager» folklorlyq ansambli, oblystyq fılarmonııa solısteri men oryndaýshylary óner kórsetedi.
18 qyrkúıekte saǵat 19.00-de Astana qalasynyń Jastar teatrynda oblystyq Mahambet atyndaǵy qazaq drama teatrynyń ártisteri Sh. Aıtmatovtyń «Máńgúrt» atty qoıylymyn kórsetedi.
