Astanada batyr Á. Moldaǵulovanyń eskertkishine gúl shoqtary qoıyldy
UOS ardagerleriniń el aldyndaǵy eren eńbegi men qan maıdandaǵy erligine taǵzym etip, olardy aıtýly merekemen quttyqtady.
Merekelik shara barysynda Álııa eskertkishine gúl shoqtary qoıylyp, S.Seıfýllın atyndaǵy QazATÝ shyǵarmashylyq ujymy jurtshylyq nazaryna mektep oqýshylarynyń qatysýymen uıymdastyrylǵan «Er erligi el esinde» atty mýzykalyq-dramalyq qoıylymyn jáne «Ótken jyldarǵa taǵzym» atty kontserttik baǵdarlamasyn usyndy.
Saryarqa aýdanynyń ákimi Ermek Ospanovtyń aıtýynsha, búgingi shara arqyly qala halqy ardagerlerge degen qurmeti men sheksiz alǵysyn bildirýge múmkindik alyp otyr. Qazirgi tańda Saryarqa aýdanynda 400-ge jýyq ardager turady.
15 jastaǵy Álııa Moldaǵulova soǵys bastalǵanda óz erkimen maıdanǵa surandy. 1943 jyly Snaıperler daıyndaý ortalyq áıelder mektebin aıaqtap, 54-inshi arnaıy atqyshtar brıgadasy 4-batalonynyń snaıperi bolǵan (22-shi ásker, 2-shi Baltyq jaǵalaýy fronty). Jaý áskeriniń 30-dan astam sarbazy men ofıtseriniń kózin joıǵan. 1944 jyly 14 qańtarda Pskov oblysynyń soltústigindegi Novosokolnıkı aýdanynda nebári 19 jasynda qaza tapty.
Álııa Nurmuhambetqyzy Moldaǵulovaǵa 1944 jyly 4 maýsymda Keńes Odaǵynyń Batyry ataǵy berildi. Lenın ordenimen marapattaldy. Novosokolnıkı aýdanynyń Monakova aýylynda jerlengen.
