Astanada «Batyl júrek» anımatsııalyq fılminiń qazaq tilindegi nusqasynyń premerasy ótti
ASTANA. 21 maýsym. QazAqparat - Keshe Astanada «Dısneı»/«Pixar» kınostýdııasynyń «Batyl júrek» anımatsııalyq fılminiń qazaq tiline aýdarylǵan nusqasynyń qaıyrymdylyq kórsetilimi ótti.
Ony alǵashqy bolyp Astanadaǵy balalar úıleriniń tárbıelenýshileri, orta mektepterdiń, Nazarbaev Zııatkerlik mektebiniń oqýshylary tamashalady.
«Bolashaq» Qaýymdastyǵy keńesiniń tóraǵasy Baýyrjan Baıbektiń aıtýynsha, «Batyl júrek» «Bolashaq» Qaýymdastyǵynyń, «Altyn qyran» qory men «Meloman» kompanııasynyń «Dısneı»/«Pixar» kınostýdııasymen birge júzege asyrǵan ekinshi jobasy. Eske salsaq, Buǵan deıin «Kólikter-2» mýltfılminiń qazaq tilindegi nusqasy kórermenderge jol tartqan bolatyn.
Fergýs patshasyn dybystaǵan QR eńbek sińirgen ártisi Tóleýbek Aralbaı atap ótkendeı, dýblıaj kezindegi eń qıyny - keıipkerlerdiń mımıkasyna dóp túsý boldy. Sebebi aǵylshyn tilindegi sózderdiń sany qazaqshaǵa aýdarmada ne uzaq ne qysqa bolyp ketedi, onymen qosqa, aǵylshyndyqtardyń tez sóıleý máneri bar. Jalpy, T.Aralbaı bolsyn, Merıda hanshaıymyn dybystaǵan jas talant Іńkár Ábdirash bolsyn, rólge ený, dybys yrǵaǵyn saqtaý, mátin aýdarmasynyń sapalyǵyn saqtaý turǵysynan óz mindetterin joǵary deńgeıde oryndap shyqty.
Dýblıaj jumystary 1-12 mamyr kúnderi aralyǵynda Almaty qalasyndaǵy Cinema Tone Production stýdııasynda júrgizildi. Jobanyń júzege asyrylýyna Qazaqstan, AQSh, Ulybrıtanııa, Reseı elderiniń mamandary qatysty.
Jobanyń bas demeýshisi - «Altyn qyran» qory. Bıýdjeti - 19 mln. teńge.
«Batyl júrek» anımatsııalyq fılmi Qazaqstan kınoteatrlarynda 21 maýsymnan bastap qazaq jáne orys tilderinde kórsetile bastaıdy.
