Astanada batýttyń aýdarylýy: Taraptar sotta kelisimge kelmedi
ASTANA. QazAqparat - Astanada qatty jel saldarynan batýttyń aýdarylyp, 5 balanyń zardap shegýine qatysty oqıǵa boıynsha sot otyrysy ótti, dep habarlaıdy QazAqparat tilshisi.
Atalǵan oqıǵaǵa qatysty batýt qojaıyny japa shekken balalardyń ata-analarymen kelisimge kelip materıaldyq jáne moraldyq shyǵyndardy tolyq ótedi. Asa aýyr qylmysqa jatpaǵandyqtan, máseleni medıatsııa jolymen sheshý usynyldy.
Degenmen sýdıa ekijaqty kelisim men keshirimdi sot aldynda óz aýyzdarynan estýimiz kerek degen sheshimmen sot otyrysyn ótkizdi.
Sot otyrysyna aıyptalýshy men jábirlenýshi tarap qatysty. Sot protsesinde aıyptalýshyny aldyn ala keshirý týraly medıatsııalyq kelisimge qol qoıa tura, jábir kórgen qyz bala anasy Záýre Asabaeva óziniń qarsylyǵyn bildirip, keshirim bermeıtinin aıtty.
«Qyzymnyń jaǵdaıy qıyn, kók baýyryna ota jasalyp alyp tastady. Onyń ústine bir qolynyń jumys isteýi qıyn. Tashkentke baryp em qabyldaǵan soń ǵana qmyldaı bastady. Sonymen qatar ákimdikten qyzyma kámelettik jasqa tolǵansha jylyna bir ret saýyqtyrý ortalyǵyna joldama berýin talap etemin», - dedi jábir kórgen balanyń anasy Záýre Asabaeva.
Oǵan aıyptalýshyny aldyn ala keshirý týraly medıatsııalyq kelisimge nelikten qol qoıdyńyz degen saýal qoıyldy.
«Ol kezde qyzyma ota jasatyp eseńgirep júrgen kezim edi. Maǵan medıator kelip túsindirmesten qol qoıǵyzyp aldy. Onyń ústine barlyq qujattar orys tilinde boldy, al men oryssha túsinbeımin. Men qyzym 18-ge tolǵansha em-domyna tolyq jaýap beretin jaǵdaıda ǵana keshirimimdi beremin», - dedi jábirlenýshi.
Ekijaqty kelispeýshiliktiń oryn alýyna baılanysty sýdıa sot otyrysyn keıinge shegerip 2 tamyzǵa qaldyrdy.
Eske sala ketsek, 4 mamyrda elordada «Jannur» saýda úıi aýmaǵyndaǵy batýtty qatty jel ushyryp, 5 bala zardap shekken bolatyn.
