Astanada batık ónerine arnalǵan jumystardyń kórmesi ashylady
ASTANA. 21 maýsym. QazAqparat - 28 maýsym kúni Qazaqstan Respýblıkasy Tuńǵysh Prezıdentiniń Mýzeıinde «Jibek joly» atty aımaqtyq batık óneri saıysyna qatysýshylardyń jumystarynan uıymdastyrylǵan kórmeniń ashylýy bolady.
Bul týraly murajaıdyń baspasóz qyzmetinen habarlady.
Kórme «Balalyq shaqtan kózqaras» atty joba aıasyndaǵy QR Tuńǵysh Prezıdenti Mýzeıiniń jáne Balalar kórkemsýret mektebi - ıÝNESKO klýbynyń birlesken kezekti is-sharasy.
Beıneleý óneriniń osy janry boıynsha saıys-kórme Astana qalasynda alǵash ret uıymdastyrylyp otyr. Bul saıys Astana qalasy Balalar kórkemsýret mektebi - ıÝNESKO klýbynyń bastamasy bolyp tabylady. QR Tuńǵysh Prezıdentiniń Mýzeıi kórmeniń qonaqtary men qatysýshylaryna mýzeıdiń eń kórikti kórme zaldarynyń esigin ashady.
Kórme balalar shyǵarmashylyǵy arqyly kóne batık ónerimen tanysýǵa múmkindik beredi. Batık - matany qolmen bezendirýdiń erekshe tehnıkasy. «Batık» termıni Indonezııadan kelgen. Batık tarıhy san ǵasyrlardy qamtıdy. Búgingi kúni batık tehnıkasy arqyly Úndistanda avangardtyq kórkem shyǵarmalar dúnıege keledi. Úndistannan basqa kóptegen elder de batık ónerin ózderiniń ulttyq óneri dep sanaıdy. Olar mysaly, Indonezııa, Malaızııa, Shrı-Lanka jáne Taıland. Batık tehnıkasy úlgisinde jasalǵan ǵajaıyp dúnıeler Shyǵys pen Batys elderi naryǵynda kóptegen suranysqa ıe.
Batık óneri boıynsha saıys-kórmege Astana, Almaty, Qaraǵandy, Aqtóbe, Badamsha jáne Pavlodar qalalarynan 100-den astam jumystar qoıylatyn bolady. Jeńimpazdar saıystyń dıplomdarymen jáne qundy syılyqtarmen marapattalady.
