Astanada bastaýysh muǵalimderi men balabaqsha tárbıeshileri jetispeıdi
ASTANA. QazAqparat - Astanada bastaýysh synyp muǵalimderi men balabaqsha tárbıeshileri jetkiliksiz. Bul týraly búgin Astana qalalyq máslıhatynyń 40-shy sessııasynda máslıhat depýtaty Záýre Júsipova aıtty.
«Aldaǵy eki jylda bizde bastaýysh synyp muǵalimderi men balabaqsha tárbıeshileriniń jetispeýshiligi qatty seziletin bolady. Búginde atalǵan salanyń tym az qarjylandyrylýy búldirshinderdiń uztazdary men tárbıeshileri degen mamandyqtyń bedelin túsirip otyr. Sonyń saldarynan biz pedagogtardyń jetispeýshiligin barlyq jerde qatty sezinip otyrmyz» - dedi depýtat.
Onyń aıtýynsha, bilim berý salasynan kadrlardyń jappaı ketýi jalaqynyń azdyǵyna tikeleı baılanysty. Sondaı-aq, JOO bitirgen kóptegen mamandar óz qyzmetin pedagogıkamen baılanystyrýdan qashady.
«Bir ǵana mysal, orta mamandy bilimi bar bastaýysh synyp muǵalimi joǵary oqý ornyn bitire salyp, mektepke kelse, oǵan nebary 35 740 teńge tólenedi. Al joǵary bilimdi muǵalim 18 saǵattyq jumysyna 42 400 teńge alady. Deıturǵanmen qazirgi kezde bastaýysh synyptary ustazdarynyń kóp bóligi zeınetke shyǵatyn jasqa taıap qalǵan» - dep atap ótti máslıhat depýtaty.
Z. Júsipovanyń aıtýynsha, elordada jyl saıyn mıgratsııa men joǵary týý kórsetkishiniń áserinen mektep tabaldyryǵyn attaıtyndardyń sany eselenip keledi. «Biz búginde birinshi synypqa kelýshilerdiń orasan zor kólemine kýáger bolyp otyrmyz. Máselen, bıyl bir ǵana 60-shy mektep-lıtseıge 500 búldirshin birinshi synypqa qabyldandy. Astana boıynsha biz jylyna ár mektepten 5-ten 7-ge deıin birinshi synyp ashamyz. Al bastaýysh synyp muǵalimderin daıarlaıtyn oqý orny jalǵyz ǵana Gýmanıtarlyq kolledj bolyp otyr. Sonymen qatar, L. Gýmılev atyndaǵy EUÝ de bastaýysh muǵalimderin daıyndaıdy. Alaıda bular tym az» - dedi ol.
