Astanada baspana kezeginde 36 myńnan astam azamat tur
«Jyl saıyn elordaǵa júzdegen jas otbasylar qonys aýdaryp jatyr. Olardyń qatarynda el oblystarynan ǵana emes, sonymen qatar shetelden kelgender de bar. Soǵan baılanysty Astanada jańa ári sapaly baspana salý máselesi ózekti. Qala damyǵan saıyn onyń halqy da kóbeıe beretindigi málim. Sondyqtan áleýmettik turǵyn úılerdi salýdyń mańyzy da joǵary. Qazirgi ýaqytta Astanada memlekettik qordan baspana alý kezeginde turǵandardyń sany 36 myńǵa jetip otyr», - dedi Lýkın.
Onyń aıtýynsha, osy turǵyda jalǵa beriletin áleýmettik turǵyn úı salý baǵdarlamasy qolǵa alynǵan.
«Baspanaǵa zárý azamattardyń negizgi bóligi - jas otbasylar, múgedek nemese ata-anasy joq balalardy asyrap jatqan otbasylar, tolyq emes januıalar jáne taǵy basqalary. Sondyqtan eń tıimdisi - osy arendalyq páterlerdiń qurylysy. Sondyqtan Astana qalasy ákimdigi, «Báıterek» basqarýshy holdıngi men «Qazaqstannyń ıpotekalyq kompanııasy» tıisti jumystardy atqarýda. Ulttyq qordan respýblıka boıynsha 180 mlrd. teńge bólindi», - dep atap ótti ol.
180 mlrd. teńgeniń 35 mlrd. teńgesi jergilikti atqarýshy organdarǵa arnalǵan. Olar bul qarjyny qajetti ınfraqurylymdy jasaqtaýǵa jumsaýy tıis. «Báıterek» holdıngine jalǵa beriletin úıler salyp, olardy satyp alýǵa 145 mlrd. teńge bólindi. Bul qarjynyń 92,5 mlrd. teńgesi 2015 jyly, qalǵan 52,5 mlrd. teńgesi 2016 jyly ıgerilýi tıis.
