Astanada baspana baǵasynyń kóterilýi Almatydaǵy jer silkinisimen baılanysty ma

ASTANA. KAZINFORM – Sarapshylar Almatyǵa qaraǵanda Astanada páter baǵasynyń kóterilgendigin aıtady. Bul jer silkinisimen baılanysty ma? Osy saýalǵa Qazaqstannyń Birikken rıeltorlar qaýymdastyǵy prezıdentiniń keńesshisi Nına Lýkıanenko jaýap berdi.

«Ókinishke oraı, dúrbeleńge túsý elementi qysqa merzimdi ǵana bolady. Degenmen, ol qalaı degende de baǵaǵa áserin tıgizedi. Al jer silkinisi elesiniń tolqyny jan-jaqty habarlanyp, tipti baspasózde asyra silteý de boldy. Dál osy jaıt kóptegen adamǵa áser etip, olardyń qaýpin kúsheıte tústi. Biraq, suranys satyp alýshynyń tólem qabiletine, naqty sheshimine baılanysty ekendigin túsiný qajet. Menińshe, mundaı qubylys qysqa merzimdi ǵana», — dedi ol agenttik tilshisine bergen suhbatynda. 

Sonymen qatar ol «taıaý ýaqytta páter baǵasy kóterilýi múmkin be» degen saýalǵa jaýap berdi. 

«Qazirgi ýaqytta mende ondaı úmit múldem joq desem de bolady. Alaıda, tyńǵylyqty zerdelep qarasaq, kóptegen satyp alýshy men satýshy qaıtalama naryqtaǵy baǵanyń tómen qaraı syrǵı túskenin baıqar edi», — dedi ol. 

Esterińizge sala ketsek, resmı statıstıkalyq derekterge sáıkes, sáýirde Astanadaǵy páter baǵasy Almatydan asyp túsken bolatyn.