Astanada «Barys» atty túngi iz kesýshi top quryldy
TANA. 22 tamyz. QazAqparat - «Astana garnızony bazasynyń aıasynda «Barys» atty túngi iz kesýshi top quryldy»,-dep habarlaıdy Astana qalalyq Іshki ister departamentiniń baspasóz qyzmeti.
Baspasóz málimetterine qaraǵanda, mundaı qurylymdy jasaqtaýdaǵy basty maqsat - elordada izi sýymaı ashylǵan qylmystar sanyn arttyrý. Sonymen qatar atalmysh shara qylmystyq ahýal kúrdeli aımaqtarda tártip saqshylarynyń barynshy tyǵyz ornalasýyn qamtamasyz etip, kópshilik oryndar men kóshelerdegi tártiptiń saqtalýyna yqpal etý bolyp tabylady. Osy rette «Barys» jasaǵynyń alǵashqy jıynynda Astana qalalyq Іshki ister departamentiniń bastyǵy, general-maıor Amantaı Áýbákirov tártip saqshylarynyń nazaryn qoǵamdyq tártipti qamtamasyz etý men elordadaǵy qylmyspen baılanysty jaǵdaıdy saýyqtyrý máselesine basa nazar aýdardy.
Túngi iz kesýshi jasaqtardyń quramyna Krımınaldyq polıtsııa qyzmetiniń tájirıbeli qyzmetkerleri men jol polıtsııasynyń jáne arnaıy maqsattaǵy jedel áreket etýshi jasaqtar kirip otyr. Túngi ekıpajdar endi qalanyń túngi tynyshtyǵyn tekserý sharalaryn jiti nazarǵa alatyn bolady. Bul rette saqshylar ásirese qylmystyq ahýaly jaısyz aımaqtar men saýda ortalyqtary, turǵyn úı aýmaqtary men meıramhanalardyń jáne dámhanalardyń mańyn jiti qadaǵalaıtyn bolady. Bul toppen qatar elordada «Tobyl», «Antal» sııaqty toptar da jumys isteıtin bolady. Olar qala tártibin túnde de kúndiz de qadaǵalaıdy. «Barys» tobynyń alǵashy jumys kúninde jaqsy jolǵa qoıylǵan qımyldardyń arqasynda Aqmola oblysynyń 1990 jyly týylǵan azamaty ustaldy. Ol 19-20 tamyz aralyǵynda «Audi» markaly kóliginiń artqy terezesin syndyryp, kólikten quny 200 myń teńgeniń avtomagnıtolasyn urlap ketken. Sondaı-aq osy túni kólikten benzın urlamaq bolǵan A. atty azamat ustaldy. Al túngi 3-ter shamasynda 1989 jyly týylǵan azamattan uıaly telefon urlap alǵan Ońtústik Qazaqstan oblysynyń 3 turǵyny qolǵa tústi.
