Astanada «Bárimiz birdeımiz - kemsitýdi bilmeımiz» baıqaýynyń úzdikteri anyqtaldy
ASTANA. 6 tamyz. QazAqparat - Múmkindigi shekteýli jandar arasynda daryndy adamdardy anyqtaýǵa arnalǵan «Bárimiz birdeımiz - kemsitýdi bilmeımiz» baıqaýy jalǵasyn taýyp keledi. Keshe elordada «Úzdik bı», «Úzdik oryndaýshy», «Úzdik jasampaz» jáne «Eń tatý otbasy» atalymdary boıynsha irikteý týrnıri ótkizildi. Bul týraly astana.kz saıtynan habarlady.
«Úzdi bı» atalymynda 5 úmitker baq synasty, sonyń ishinde úsheýi 3 bı toptary. Qazylar alqasy 1-oryndy «Aq shaǵala» bı tobyna berý týraly sheshimdi biraýyzdan qabyldady, 2-oryndy Aızada Qoıshybaeva men «Shamshyraq» bı toby bólisti, 3-orynǵa «Jazıra» bı toby men Elshat Jańabergenov turaqtady.
Qazylar alqasynyń sheshimimen úzdik oryndaýshy atalymyndaǵy 13 qatysýshy vokaldyq jáne aspapty mýzyka janryna bólindi. Vokaldyq óner kórsetýde Altynshash Muqataeva men Aınagúl Nuǵymanova 1-oryn, Irına Son men Rýslan ıAmaletdınov 2-oryn, Polına Fýradeeva men Ekaterına Nochevchýk 3-oryn aldy. Aspapty mýzyka janrynda Sevda Álıeva (pıanolla) 1-orynǵa, Ulan Syrǵabaev (dombyra) 2-orynǵa, Baqytnur Jarmaǵanbetov (gıtara) 3- orynǵa ıe boldy.
«Úzdik jasampaz» atalymynda 42 ótinish qabyldandy. Bıserden, teriden jáne basqa da kerek materıaldardan jasalǵan buıymdar qazylar alqasynyń nazaryna usynyldy.
Danagúl Seıtpekova (teriden jasalǵan kartınalar) men Bereke Quspekova úzdik atandy. 2-oryndy Aleksandr Rýdakov, Rımnat Ilıasov jáne Ramazan Esmaǵambetov ózara bólisti. 3-orynǵa ıÝsıf Ismaılov, Kenjegúl Kıkenova jáne Erbol Qojahmetov ıe boldy.
«Eń tatý otbasy» atalymynda múgedek balalardy tárbıelep otyrǵan nemese ata-analar múmkindigi shekteýli jandar bolyp tabylatyn 7 otbasy baq synasty. Eki týrdyń qorytyndysy boıynsha Potapovtar, Bazylbekovter, Ismaılovtar otbasylary 3-oryn aldy. 2-orynǵa Ótebaevtar men Kenjebek otbasy turaqtady. Zakarıanovtar men Rýblevskıı otbasylary úzdik atandy.
Eske salaıyq, «Bárimiz birdeımiz - kemsitýdi bilmeımiz» baıqaýy Qazaqstanda alǵash ret uıymdastyrylyp jatyr. Ol múgedektigi bar daryndy jandardy anyqtaýǵa jáne qoldaýǵa, olardyń óz oıyn bildirýdiń jáne júzege asyrýdyń quraly retinde shyǵarmashylyq qyzmetterine qoǵam nazaryn aýdarýǵa baǵyttalǵan. 2-7 tamyz aralyǵynda Astanada 11 atalym boıynsha baıqaýdyń irikteý týrlary ótip jatyr.
«Úzdik sportshy» jáne «Jeńiske jiger tanytqany úshin» atalymdary boıynsha sońǵy irikteý týrlary 7 tamyzda saǵat 10.00 «Qazaqstan» SK ótedi.
