Astanada «Bári de án aıtady» atty karaoke chempıonaty ótedi
ASTANA. QazAqparat - Elordada karaokeden «Bári de án aıtady» atty ashyq chempıonaty ótedi. «Jastar» saraıynyń bastamasymen jáne elorda ákimdiginiń qoldaýymen ótkiziletin shara úshinshi ret óz tyńdarmandaryn qýantpaq. 18 jastan asqan azamattar mýzykalyq biliminiń bar-joqtyǵyna qaramastan basty syılyq - Astana ákiminiń kýbogyna talasa alady.
Chempıonatqa qatysý úshin kastıng 19 mamyrda saǵat 17.00-de «Jastar» saraıynda ótedi, konkýrsanttar ózderiniń súıikti bir ánin oryndaýy tıis. Birinshi irikteýden ótken vokalıster kásipqoı ánshilermen daıyndalady, olardyń trenıngteri men sheberlik synyptaryna qatysady. Budan basqa qatysýshylar otandyq juldyzdarmen kezdesedi. Sonymen qatar, chempıonatqa qatysýshylar eki irikteý týrynan ótedi, sodan keıin jartylaı fınal men fınalda baq synaıtyn bolady.
«Halyq» karaokesine qatysýshylar úsh topqa bólinedi, onyń árqaısysy boıynsha jeńimpaz anyqtalady, Ákimniń kýbogy eń kóp ball jınap, top jarǵan ánshige tabystalady.
Astana qalasynyń Mádenıet, muraǵattar jáne qujattama basqarmasynyń málimeti boıynsha, chempıonattyń birinshi jáne ekinshi irikteý týrlary 10 jáne 24 maýsymda, jartylaı fınal men fınal 5-6 shildede ótedi.
Eske salaıyq, karaokeden «Bári de án aıtady» chempıonaty elordada eki jyl buryn alǵash ret ótken bolatyn. Ol kezde qatysýǵa 200-den asa ótinim qabyldanǵan. Chempıonattyń qorytyndysy boıynsha Nurlan Tókenov, Denıs Nı jáne Mılana Serikova jeńimpaz atandy. Jas talantty oryndaýshyǵa Astana ákiminiń kýbogy tabystaldy. Ótken jyly chempıonatqa qatysýshylar qyzyl alashamen júrip ótip, óz áserlerimen bólisti.
