Astanada bankrot-kásiporyndardyń sany artty
ASTANA. QazAqparat - Astana qalasynyń mamandandyrylǵan aýdanaralyq ekonomıkalyq sotynda (MAES) boryshkerlerdiń ózderin bankrot dep jarııalaý men ońaltý protsedýralaryn qoldaný týraly ótinimderdiń kóbeıgenin habarlady.
«Ótken jyly Astana MAES 165 azamattyq isti qarady, 155 zańdy tulǵa men 10 jeke kásipkerge qatysty bankrottyq protsedýra qoldanyldy. Al bıyl kelip túsken ótinimder sany 673-ti kórsetti. Onyń 605-i boıynsha azamattyq is qozǵalyp, sheshim shyǵaryldy. Atalǵan sanat boıynsha taǵy 377 azamattyq is sot óndirisinde jatyr. Bul másele boıynsha Astana MAES úsh sýdıadan quralǵan arnaıy mamandandyrylǵan top qurdy. Sýdıalardyń sanyn budan ári kóbeıte almaımyz, sebebi bizdegi shtat sany jınaqtalǵan. Sondyqtan, bul máselelermen úsh sýdıa aınalysýda», - dedi búgingi dóńgelek ústelde Astana MAES tóraǵasynyń mindetin atqarýshy Aıgúl Jamansarıeva.
Baspasóz qyzmetiniń habarlaýynsha, qaýqarsyzdyq týraly is aıasynda qazirgi quqyqtyq mehanızmder konkýrstyq jıynǵa múlikti aıtarlyqtaı qaıtaryp berýge jáne boryshkerdi baqylaýshy tulǵalardy birikken jaýapkershilikke tartýǵa múmkindik beredi. Bankrottyq protsedýrasy barysynda kredıtorlardyń bereshek somany alý múmkindigi kredıtorlardyń óz boryshkerlerin bankrot dep jarııalaý týraly sotqa jıi júginýine ákep soǵady.
Sonymen birge, bankrottyq pen ońaltý protsedýrasyn aıaqtaý merzimin saqtaý máseleleri turaqty baqylaýda. Búgingi tańda 202 sharýashylyq júrgizýshi sýbektige qatysty (2010-2016 jyldar) bankrottyq protsedýrasy aıaqtalǵan joq.
