Astanada bank qyzmetkeri Ulttyq qaýipsizdik komıtetiniń arnaıy operatsııasyn búldirgen

ASTANA. KAZINFORM – Elordada sotqa deıingi tergep-tekserý júrgizýge kedergi jasaý faktisi boıynsha bank qyzmetkerine qatysty is qaraldy (Qylmystyq kodekstiń 407-babynyń 3-bóligi).

Astana qalasynyń qylmystyq ister jónindegi aýdanaralyq sotynyń habarlaýynsha, B. óziniń qyzmettik mindetterin atqarý kezinde, sotqa deıingi tergeýden túsken saýalda tanysy týraly málimetti kórgen. Keıin ol tanysy K.-ge qońyraý shalyp, qylmystyq is boıynsha onyń týysyna qatysty kelip túsken málimetten habardar etken.

B-nyń (bank qyzmetkeri) áreketi saldarynan Ulttyq qaýipsizdik organdarynyń Astana qalasyna atys qarýy men oq-dárilerdi jetkizý jolyn kesýge baǵyttalǵan arnaıy operatsııanyń buzylýyna jol berildi.

«B. óziniń qyzmettik jaǵdaıyn paıdalana otyryp, sotqa deıingi tergep-tekserýdi júzege asyratyn adamnyń qyzmetine qasaqana aralasqan. Bul ulttyq qaýipsizdik organdarynyń qylmystyq istiń aldyn alýǵa baǵyttalǵan operatsııasynyń júzege asýyna qaýip tóndirdi. Sot talqylaýy barysynda sottalýshy kinásin moıyndamady, qorǵaýshy tarap ony aqtaýdy surady», - delingen sot taratqan aqparatta.

Sondaı-aq, sottalýshynyń jas balalarynyń bolýy qylmystyq jaýaptylyq pen jazany jeńildetetin mán-jaı retinde tanylǵan jáne qylmystyq jaýaptylyq pen jazany aýyrlatatyn mán-jaı anyqtalmaǵan.

«Sottalýshynyń kinási kýágerlerdiń aıǵaǵymen, sot saraptamalary jáne mamandardyń qorytyndysymen dáleldendi. Sot úkimimen B. 1 jyl merzimge bank qyzmeti salasynda belgili bir laýazymdy atqarý quqyǵynan aıyryla otyryp, 1 jylǵa bas bostandyǵy shekteldi», - deıdi qalalyq sottan.

Úkim zańdy kúshine engen joq.