Astanada balyq aýlaýǵa shyqqan er adam iz-túzsiz joǵalyp ketti
ASTANA. QazAqparat - Ótken aptanyń senbi kúni Astanada er kisi óziniń áriptesterimen balyq aýlaýǵa ketip, úıine qaıtyp oralmaǵan, dep habarlaıdy QazAqparat.
Astana qalalyq ІІD baspasóz qyzmetiniń habarlaǵanyndaı, qazirgi ýaqytta joǵalǵan er azamatty izdeý jumystary júrgizilýde.
«Aqmola oblysy boıynsha, jaqyn aýyldarda jáne Nura ózeniniń boıymen jan-jaqty izdestirý sharalary júrgizilýde. Іzdestirý isi qozǵaldy, onyń aıasynda joǵalǵan er kisini izdestirýdiń barlyq qajetti sharalary qolǵa alynyp jatyr», - dep atap ótti departamenttiń baspasóz qyzmeti.
Іz-túzsiz ketken Berik Qusaıynovtyń zaıyby «QazAqparat» tilshisine bergen suhbatynda onyń janynda bolǵan áriptesteri úılerine oralǵandaryn, biraq qoıǵan suraqtarǵa jaýap bergileri kelmeıtindigin aıtty.
«Kúıeýim áriptesterimen birge ketken, biraq olar kúıeýimsiz qaıtyp keldi. Men Aýdandyq Іshki ister bóliminde boldym, olardyń biri sonda otyr. Meniń qoıǵan saýaldaryma ol jaýap qatpady. Biz onyń janynda otyrdyq, ol maǵan tis jarmady, izdeý jumystary qalaı júrip jatqandyǵyn aıtpady, amandaspady da. Ol kisi ún-túnsiz ústelge qarap qana otyrdy», - dedi ol.
Er adamnyń joǵalǵany týraly aqparat Facebook áleýmettik jelisinde jarııalanǵan bolatyn. Onda Berik Qusaıynovtyń 1984 jyly týǵandyǵy, úıden 19:00 shamasynda áriptesterimen birge Aqmola oblysy Sabyndy aýylyna qaraı balyq aýlaýǵa shyqqany týraly habarlanǵan.
Ol óziniń Toyota 4Runner kóligimen ketken.
