Astanada «Balet. Bekzada óner besigi» atty derekti fılmniń tusaýkeseri ótti
ASTANA. QazAqparat - Astanada balet ónerine qadam basqan jas órenderdiń ómirin sýretteıtin «Balet. Bekzada óner besigi» derekti fılminiń tusaýkeser rásimi ótti, dep habarlaıdy «QazAqparat» HAA tilshisi.
Derekti «Qazaqstan» telearnasynyń tapsyrysy boıynsha túsirilgen.
«Bizdiń ujym jalpy derekti týyndylarǵa, onyń ishinde derekti jýrnalıstıkaǵa erekshe mán beredi. Bıyl birneshe jobany qolǵa alyp otyrmyz. Máselen, tarıhı tulǵalar týraly túsirilgen «Uly dala ulaǵaty», Qazaqstannyń kórkem tabıǵatyn pash etetin «Kıeli Qazaqstan» jáne basqa da derekti týyndylardy jaryqqa shyǵarýdamyz. Búgin nazarlaryńyzǵa «Balet. Bekzada óner besigi» týyndysyn usynyp otrmyz. Bul Elbasynyń ıdeıasymen júzege asqan mádenı nysandar jaıly derekti fılmder toptamasynyń alǵashqy týyndysy. Jobamyzdyń maqsaty - Qazaqstannyń mádenı ómiri men jetistikterin nasıhattaý», - deıdi Arman Áshimov dedi OKQ-da ótken baspasóz máslıhatynda.
Al fılmniń avtory jáne prodıýseri Dınara Sátjannyń aıtýynsha, fılmniń basty keıipkerleri - Álı, Tamıla jáne Kámıla oınaıtyn fılm Qazaq ulttyq horeografııa akademııasy men balalar týyp ósken Taraz qalasy jáne ShQO-nyń Glýbokoe aýdanynda túsirilgen.
«Týyndy balet ónerine jańadan qadam basqan jas jetkinshekterdiń shynaıy ómirin sýretteıdi. Osy fılm arqyly Qazaq ulttyq horeografııa akademııasynyń ónerpazdarynyń bir kúnin tamashalaýǵa bolady. Týyndynyń maqsaty - balettiń zor eńbekti talap etetinin kórsete otyryp, bul eńbekke tárbıeleýshiler balalardy 6-7 jasynan bastap daıyndaıtynyn kórsetý. Balalar jap-jas bolǵanyna qaramastan, óziniń naqty maqsatyn belgilep qoıǵan. Akademııadan erkelikpen úlkenniń mazasyn alǵan birde-bir balany kórgen emespin. Onda balalar ınternatta turatyndyqtan, barlyǵy ózdigimen jaýapkershilikti sezingen. Olar 6-7 jasynda-aq óziniń kásibin tańdap qoıǵan órender», - deıdi Dınara Sátjan.
Derekti fılm 21-23 qarasha aralyǵynda «Kinopark» kınoteatrlar jelisine qarasty Astana, Almaty, Shymkent jáne Aqtóbe qalalarynda kórsetiletin bolady. Barlyq kelýshilerge týyndyny tegin tamashalaı alady.
