Astanada balanyń qola músinin qoldy qylǵan uryǵa úkim shyqty
ASTANA. QazAqparat - Astana qalalyq soty balanyń qola músinin jáne Uly Otan soǵysy jaýyngerlerine ornatylǵan eskertkishtiń áripterin qoldy qylǵan uryǵa úkim shyǵardy, dep habarlaıdy QazAqparat tilshisi.
«2018 jylǵy 20 maýsymda Astana qalasy, Saryarqa aýdandyq №2 soty jalpy quny 8 mıllıon teńgeden asatyn múlikti urlaǵan er adamǵa qatysty úkim shyǵardy. Sottyń úkimimen aıyptalýshy 4 jyl merzimge bas bostandyǵynan aıyryldy. Ol qylmystyq-atqarý júıesiniń qaýipsizdigi barynsha kúsheıtilgen mekemesinde jazasyn óteıdi», - dep málimdedi qalalyq sottyń baspasóz qyzmeti.
Іs materıaldaryna qaraǵanda, ústimizdegi jyldyń 20 naýryzynda, 5 jáne 7 sáýir kúnderi er adam Uly Otan soǵysynyń jaýyngerlerine ornatylǵan eskertkishtiń metall áripterin, tsıfrlaryn, lavr japyraǵy tárizdes alqagúldi qoldy etken. Al 23 naýryzda «1932-1933 jyldardaǵy asharshylyq qurbandaryna» ornatylǵan eskertkish kesheninen balanyń qola músinin urlaǵan.
2018 jylǵy 1 tamyzda Astana qalasynyń qylmystyq ister jónindegi apellıatsııalyq sot alqasy birinshi ınstantsııanyń úkimin ózgerissiz qaldyrdy.
Úkim zańdy kúshine endi.
Sotta aıyptalýshynyń urlaǵan zattaryn metall synyqtaryn qabyldaý pýnktine ótkizgeni aıtyldy. Sot otyrysynda sottalýshy óz qylmysyna ókinetinin aıtty.
Aıta keterligi, eskertkishterdi urlaǵan adam buryn da eki ret aýyr qylmys jasaǵany úshin jazalanǵan.
