Astanada balany mektepke nemese balabaqshaǵa ornalastyrý áli de ózekti másele bolyp otyr - Toqaev

ASTANA. QazAqparat - Memleket basshysy Qasym-Jomart Toqaev elordany damytý máseleleri jóninde keńes barysynda qalynyń bilim salasyndaǵy problemalarǵa toqtaldy, dep habarlaıdy QazAqparat Aqordanyń baspasóz qyzmetine silteme jasap.

«Sapaly bilim berý qyzmetiniń qoljetimdi bolýy asa mańyzdy. Astanada balany mektepke nemese balabaqshaǵa ornalastyrý áli de ózekti másele bolyp otyr. Kóptegen mektepte oqýshylar sany josparly mejeden artyq. Shyn máninde, úsh aýysymdy oqytý júıesi saqtalyp otyr. Buǵan jol berýge bolmaıdy. Qalada jańa bilim berý mekemeleriniń qurylysyna basymdyq berý qajet. Sondaı-aq 15 qosymsha bilim berý nysanyn salý kerek»,-dedi Prezıdenti.

Memleket basshysy sózinde Astanada bilikti ustazdardyń tapshylyǵy erekshe sezilip otyrǵandyǵyn atap ótti.

«Jyl saıyn bir myńǵa jýyq muǵalim jetispeı jatady. Sondyqtan, elordada pedagogıkalyq joǵary oqý ornyn ashý týraly usynysty qoldaımyn. Bul – der kezinde kóterilgen bastama. Sol arqyly salynyp jatqan mektepterge qajetti mamandar daıarlaýǵa múmkindik týady. Úkimet pedagogıkalyq oqý ornyn ashýdy jáne kópbeıindi aýrýhana salýdy muqııat pysyqtaýy qajet. Qarajat máselesin sheshý kerek. Ádiletti qoǵamdy qurý úshin, eń aldymen, óskeleń urpaqtyń jan-jaqty, tolyqqandy damýyn qamtamasyz etý mańyzdy. Sondyqtan mektepterdegi bilim berý isi balalardyń áleýmettik jaǵdaıyna qaramastan, ınklıýzıvti ári barlyq bala úshin qoljetimdi bolýǵa tıis»,-dedi Qasym-Jomart Toqaev.

Osyǵan deıin ol elordany sýmen qamtamasyz etý máselesin kótergenin jazdyq.