Astanada balanyń basyna úıdiń qasbeti qulady

ASTANA. KAZINFORM – Elordada kópqabatty turǵyn úıden shyǵa bergen balanyń ústine qasbet qulady.

Jelidegi jazbaǵa qaraǵanda oqıǵa «Sat City» kópqabatty turǵyn úıde (Asfendııarov kósh, 7) bolǵan. Vıdeodan qasbettiń balanyń basyna qalaı qulaǵanyn baıqaýǵa bolady. 

Balanyń jaǵdaıyn bilý úshin qalalyq Qoǵamdyq densaýlyq saqtaý basqarmasyna habarlasqan edik.

«2024 jylǵy 12 mamyrda №2 kópbeıindi qalalyq balalar aýrýhanasynyń travmatologııalyq pýnktine bastyń samaı bóliginiń jaralynýymen 2013 jyly týǵan bala tústi. Tekserý kezinde qan ketýsiz kógergen jara anyqtaldy. Jalpy jaǵdaıy qanaǵattanarlyq», - deıdi basqarmadan. 

Habarlamada aıtylǵandaı, bala hırýrgtyń ambýlatorııalyq baqylaýyna jiberilgen, sondaı-aq tıisti usynystar berilgen.