Astanada balany urǵan tárbıeshi jazadan sytylyp ketti

ASTANA. KAZINFORM – Astana qalasynyń qylmystyq ister jónindegi aýdanaralyq soty balabaqshada tárbıelenýshige kúsh qoldanǵan áıeldi Qylmystyq kodekstiń 140-baby 2-bóligi boıynsha kináli dep tanyp, 80 saǵat qoǵamdyq jumysqa tartý jazasyn taǵaıyndady.

Іs materıaldaryna sáıkes, 2025 jylǵy qańtar–aqpan aılarynda tárbıeshi retinde jumys istegen áıel birneshe ret balaǵa kúsh kórsetken. Beınebaqylaý jazbalarynan balany urý, ıterý jáne ózge de dóreki áreketter anyq kórinis tapqan. Bul onyń fızıkalyq aýyrsynýyna jáne jylaýyna sebep bolǵan.

- Sotta aıyptalýshynyń kinási kýágerlerdiń aıǵaqtarymen, saraptama qorytyndysymen jáne beınematerıaldarmen dáleldendi. Sottalýshy kinásin tolyq moıyndap, sottan jeńil jaza taǵaıyndaýdy surady.

Memlekettik aıyptaýshy 80 saǵat qoǵamdyq jumys taǵaıyndap, amnıstııany qoldanýdy jáne balalarmen jumys isteý quqyǵynan aıyrýdy surady. Al jábirlenýshi tarap isti neǵurlym aýyr bappen qaraýdy jáne moraldyq zııannyń ótelýin talap etti, - delingen aqparatta.

Sot aıyptalýshynyń kámeletke tolmaǵan balasy bar ekenin jáne oń minezdemesin jeńildetetin mán-jaı retinde eskerip, qoǵamdyq jumys túrindegi jaza taǵaıyndady.

Alaıda, 2025 jylǵy 23 maýsymdaǵy «Qazaqstan Respýblıkasy Konstıtýtsııasynyń otyz jyldyǵyna baılanysty raqymshylyq jasaý týraly» zańǵa sáıkes, áıel taǵaıyndalǵan jazadan bosatyldy.

Jábirlenýshi taraptyń moraldyq zııandy óteý týraly azamattyq talaby ishinara qanaǵattandyryldy.

Aıta keteıik, jaqynda balalardy urǵan pavlodarlyq tárbıeshi jumystan bosatyldy.