Astanada balalarǵa qatysty zorlyq problemalaryn zertteýge arnalǵan is-sharalar ótti
ASTANA. Qyrkúıektiń 6-sy. QazAqparat - Qazaqstan Respýblıkasyndaǵy Adam quqyqtary jónindegi ýákil men BUU Balalar qory (ıÝNISEF) arasyndaǵy yntymaqtastyq týraly memorandýmnyń sheńberinde qyrkúıektiń 2-6-sy aralyǵynda Astanada balalarǵa qatysty zorlyq jasaý problemalaryn zerdeleýge baǵyttalǵan birqatar is-sharalar ótkizildi, dep habarlady quqyq qorǵaýshy vedomstvonyń baspasóz qyzmetinen.
Atalǵan is-sharalar «Qazaqstan Respýblıkasynda quqyq qorǵaý qyzmeti men sot júıesiniń tıimdiligin arttyrý jónindegi sharalar týraly» Qazaqstan Respýblıkasy Prezıdenti Jarlyǵynyń jazalardyń keıbir túrlerin izgilendirý, sondaı-aq Kámeletke tolmaǵandardy ýaqytsha oqshaýlaý, beıimdeý jáne ońaltý ortalyqtaryn bilim berý júıesiniń qaramaǵyna berý týraly baptaryn oryndaý maqsatynda ótkizildi.
Qazaqstanda balalarǵa qatysty zorlyq jasaý problemalary týraly taldama esepti ázirleý úshin áıelder men balalarǵa qatysty zorlyq jasaý, balalardy satý men qanaý, qylmystyń qurbandaryna kómek kórsetý, balalardy qorǵaý júıesi, sot ádildigi júıesine qoljetimdilik problemalary boıynsha mol jumys tájirıbesi bar ıÝNISEF halyqaralyq sarapshysy, Shyǵys Kentýkkı ýnıversıtetiniń professory Robın Haarr hanym shaqyryldy.
Josparlanǵan is-sharalar sheńberinde beıindi mınıstrlikterdiń basshylyqtarymen kezdesýler ótkizildi, Astana qalasynyń balalar mekemelerine - Kámeletke tolmaǵandardy ýaqytsha oqshaýlaý, beıimdeý jáne ońaltý ortalyǵy men Mamandandyrylǵan balalar úıine sapar jasalyndy, balalarǵa qarsy zorlyq jasaý jaǵdaıynyń aldyn alý men ońtaılandyrý jóninde memlekettik organdar men úkimettik emes sektorǵa arnap semınar ótkizildi.
Semınardyń qatysýshylary álemdegi balalarǵa qatysty zorlyqtyń bar bolýynyń halyqaralyq standarttary men tájirıbesimen tanysýǵa múmkindik aldy, sondaı-aq Qazaqstanda bul problemany sheshý boıynsha tıisti ádistemeniń ázirlenýi talqylandy.
