Astanada balalarǵa arnalǵan tegin basketbol akademııasy ashyldy
ASTANA. QazAqparat - Nazarbaev ýnıversıtetiniń sport ortalyǵy bazasynda balalarǵa arnalǵan tegin basketbol akademııasy ashyldy, dep habarlaıdy QazAqparat.
Akademııa 8-14 jas aralyǵyndaǵy qyzdar men uldardy jattyqtyra alady. Jattyqtyrý quny múlde tegin. Bas jattyqtyrýshy - Deıan Parejanın, Serbııa azamaty.
«Rasymen, akademııa ashyla qalǵan osy kezeńge biz Serbııadan maman shaqyrttyq. Bul kisi balalar basketbolyn ǵana emes, erler arasyndaǵy basketboldyń qyr-syryn jaqsy biletin adam. Úırensin dep ózimizdiń eki jattyqtyrýshyny qostyq. Jalpy, negizgi maqsatymyz - shetelden maman shaqyrý emes, basty maqsatymyz - balalar basketbolyn damytý», - deıdi Olımpıada chempıony, «Astana» basketbol klýbynyń bas dırektory Valerıı Tıhonenko.
Onyń aıtýynsha, Astananyń aýa-raıy basketboldy damytý úshin múlde kedergi keltirmeıdi. Almatydaǵy basketboldyń damýy da aýa-raıyna emes, bul sportqa qanshalyqty kóńil bólinetinine baılanysty jáne basketbol tek Almatyda damysyn degen zań joq, degen oıyn aıtty V.Tıhonenko.
«Almatynyń qandaı qala ekenin bilemin, meniń ózim - almatylyq azamatpyn. Biraq, Astananyń sondaı sýyq bolǵany kedergi keltiredi dep otyra berýge bolmaıdy. Astanada basketbol akademııasyn ashpaý múmkin emes. Sebebi, basketbol kóbine jabyq nysanda oınalatyn sport túri», - degen oıyn aıtty Tıhonenko.
Akademııaǵa qazirdiń ózinde 60 bala jazylǵan eken. Aqpan aıynan bastap «Astana» basketbol klýby qaladaǵy mektepterde sheberlik sabaqtaryn ótkizip, balalardy qyzyqtyra túspek.
