Astanada balalardyń psıhologııalyq shuǵyl kómek kabıneti ashyldy
ASTANA. 21 maýsym. QazAqparat - Búgin elordada №3 qalalyq emhana fılıaly bazasynda Astana qalasynyń Densaýlyq saqtaý basqarmasy balalardyń psıhologııalyq shuǵyl kómek kabınetin ashty.
Bul týraly astana.kz aqparattyq portalynda habarlandy.
«Kabınetti ashýdaǵy basty maqsat shuǵyl sýıtsıd jaǵdaıynda balalarǵa psıhologııalyq, psıhoterapevtik, sýıtsıdologııalyq bilikti kómekter kórsetý bolyp tabylady», - dep atap kórsetedi vedomstvodan.
Balalardyń shuǵyl psıhologııalyq kómek kabıneti osy máselemen aınalysýshy barlyq vedomstvolardyń jumystaryn úılestirip, óz-ózine qol jumsaý jaǵdaıyndaǵy kez kelgen sátte tyǵyryqtan shyǵaratyn múmkindikterdi qarastyryp, sol arqyly kámeletke jasy tolmaǵandardiń psıhologııalyq saýyqtyrylýyn kózdeıdi.
Basqarma kámeletke jasy tolmaǵandar arasynda sýıtsıdtik sıpattyń aldyn alý boıynsha keshendi jumystar júrgizedi. Olar Medıtsınalyq ortalyq bazasynda balalar men jasóspirimderge konsýltatıvtik- psıhıatrııalyq kómekter usynady.
Respýblıkalyq psıhıatrııalyq, psıhoterapııalyq jáne narkologııalyq ǵylymı-tájirıbelik ortalyqpen, sondaı-aq Astana qalasyndaǵy Oqý-klınıkalyq ortalyǵymen birge psıholog, psıhıatr, sýıtsıdologııa, daǵdarysty jaǵdaıdaǵy psıhoterapııa máseleleri boıynsha áleýmettik qyzmetkerler daıyndaıdy.
2012-2014 jyldarǵa Qazaqstan Respýblıkasynyń Úkimeti bekitken sýıtsıdterdiń aldyn alý jónindegi vedomstvoaralyq jospardy júzege asyrý aıasynda Astanada qazirdiń ózinde halyqtyń eresek tobyna arnalǵan shuǵyl psıhologııalyq kómek kabıneti jumys jasaıdy. Oǵan qosa qalanyń barlyq emhanalarynda psıhologtar men áleýmettik qyzmetkerlerdiń shtattyq birligi engizilgen.
Jasóspirimderdiń ózi-ózine qol jumsaýy keıingi jıyrma jylda barlyq órkenıetti memleketterde tótenshe ózekti máselege aınaldy.
Sýıtsıd álemde jastardyń jol-kólik oqıǵasynan keıingi ekinshi orynǵa shyqty. Jastar arasyndaǵy sýıtsıdaldy áreketter sońǵy jıyrma jylda eki esege ósken. 14 - 24 jas arasyndaǵy adamdardyń 30%-ynda sýıtsıdaldyq oı bolady eken. Jasóspirimderdiń 6%-y, qyzdardyń 10%-y sýıtsıdaldyq áreketter jasaǵandyǵy anyqtalǵan.
Sýıtsıdolog-mamandardyń saraptaýynsha, ózine-ózi qol jumsaý negizinen shıelenistiń áleýmettik-psıhologııalyq beıimsizdiginde jatady. Balalar men jasóspirimder arasyndaǵy ózin-ózi ólimge qııý qatty alańdatyp otyr. Bul ata-analarmen, muǵalimderdiń psıhologtar men dárigerlerdiń, áleýmettik jáne basqa da mamandardyń osy jaıǵa aıyryqsha nazar aýdarýyn talap etedi.
