Astanada balalardyń qatysýymen bolatyn jol-kólik oqıǵalary azaıdy - Jol polıtsııasy basqarmasy
ASTANA. Tamyzdyń 4-i. QazAqparat - Jyl basynan beri Astanada balalardyń qatysýymen 29 jol-kólik oqıǵasy oryn aldy. Olarda 4 bala mert bolyp, 25-i - túrli dárejede jaraqattar aldy.
Elordalyq Jol polıtsııasy basqarmasynyń (JPB) málimetterine sáıkes, ótken jyldyń sáıkes kezeńimen salystyrǵanda jol apattarynyń sany 40,8 paıyzǵa, jaraqattanýshylar- 45,7 paıyzǵa azaıdy.
JPB ókilderiniń aıtýynsha, balalardyń qatysýymen bolǵan jol-kólik oqıǵalarynda jaraqat alǵan balalardyń sany azaıyp otyrǵanymen (2009 jyly - 46, 2010 - 25), kólik dońǵalaqtarynyń astynda qaza tapqandardyń kórsetkishin azaıtý múmkin bolmaı otyr. Bıylǵy kórsetkishter ótken jylǵy deńgeıde qalyp otyr (4 bala).
«Balalardyń áreketterin kóp jaǵdaıda aldyn ala boljaý múmkin emes. Olar oıynnyń qyzyǵyna berilip, ne bolmasa qııal ústinde kele jatyp jol boıyna júgirip shyǵady. Sondyqtan júrgizýshi mundaı jaǵdaı kez-kelgen jerde bolýy múmkindigin qashanda este saqtaý qajet», dep atap ótti JPB-nyń ókilderi.
