Astanada balalardyń qatysýymen bolatyn JKO sanyn azaıtýǵa qol jetkizildi
ASTANA. 10 aqpan. QazAqparat - Elordada aqpannyń 7-si men 9-y aralyǵynda jol kólik oqıǵasynan jaraqat alýdyń aldyn alý maqsatynda qala aýmaǵynda «Qaýipsizdik beldigi» respýblıkalyq is-sharasy ótkizildi. Atalǵan is-sharany ótkizý kezeńinde jol polıtsııasynyń jeke quramy kúsheıtilgen rejımde jumys istedi, dep habarlady elordanyń resmı saıtynan.
«Qaýipsizdik beldigi» profılaktıkalyq is-sharasy júrgizýshiler men balalardyń jáne olardyń ata-analarynyń nazaryn avtomobıl júrgizgen kezde qaýipsizdik beldigin mindetti túrde taǵyp, balalardy alyp júrgen kezde de ony ustatý qurylyǵysy retinde ornatý kerektigine aýdartýdy kózdeıdi. Avtomobıl qaýipsizdik beldigi júrgizýshi men jolaýshynyń jol kólik oqıǵasy kezinde jaraqat alýyn birden-bir azaıtatyn negizgi qurylǵy bolyp tabylady.
Astana qalasynyń ІІD Jol polıtsııasy qyzmetkerleri, ásirese, JQE óreskel buzatyn, kólik júrgizip kele jatyp uıaly telefonmen sóılesetin, kólikteriniń áınekteri kóleńkelengen júrgizýshilerge basa kóńil bóledi. Profılaktıkalyq is-shara kezinde jol qozǵalysyna qatysýshylarǵa qaýipsizdik beldiginiń paıdasy, onyń jol kólik oqıǵasy jaǵdaıynda adam ómirin qutqarý múmkindikteri jazylǵan jadynamalar taratyldy.
«Qaýipsizdik beldigi» profılaktıkalyq is-sharasynyń tek eki kúni ishinde 1290 JQE buzý anyqtalsa, onyń 406-sy qaýipsizdik beldigin paıdalaný erejesin saqtamaý, 109-y kólik júrgizý kezinde uıaly telefonmen sóılesý bolyp tabylady. JQE buzǵan jaıaý júrginshilerge qatysty 133 hattama toltyrylyp, júrgizýshiler jol boıyna qoqys tastaǵan 64 fakti, mas kúıinde kólik júrgizgen 11 fakti anyqtaldy.
Mundaı profılaktıkalyq is-sharalardy ótkizý jol-kólik oqıǵasy sanyn azaıtýǵa múmkindik týǵyzady. Bıylǵy jyly balalardyń qatysymen bolatyn JKO sanyn 16,7%, jaıaý júrginshilerdiń qatysymen bolatyn JKO sanyn 14,3% tómendetýge qol jetkizildi.
