Astanada balalardy qysqa merzimge qaldyrýǵa laıyqtalǵan alǵashqy ortalyq ashyldy
ASTANA. Jeltoqsannyń 11-i. QazAqparat /Gúlmıra Álıakparova/ - Búgin Astanada balabaqshalardaǵy oryn tapshylyǵy problemasyn sheshý maqsatynda turǵyn úı keshenderiniń 1-3 qabattarynda ornalastyrý josparlanǵan mektepke deıingi daıarlyq ortalyqtarynyń alǵashqysy ashyldy,
dep habarlaıdy QazAqparat.
Mektepke deıingi daıarlyq ortalyǵy búgin QR Premer-Mınıstriniń birinshi orynbasary Ómirzaq Shókeev pen Astana qalasynyń ákimi Imanǵalı Tasmaǵambetovtyń qatysýymen saltanatty jaǵdaıda iske qosylǵan «Táýelsizdik» turǵyn úı kesheniniń 1-shi qabatynda ornalasty.
Jalpy aýdany 300 sharshy metrdi quraıtyn ortalyq 5-6 jastaǵy barlyǵy 80 balany qabyldaýǵa arnalǵan. Ortalyqta balalar tamaqtandyrylmaıtyndyqtan jáne onda jatyn oryndar qarastyrylmaýyna baılanysty, ata-analar sábılerin qysqa merzimge, ıaǵnı 5 saǵatqa ǵana qaldyra alady (merzimderi - tańertengi saǵat 8.30-dan 13.00-ge deıin, bolmasa 13.00-den 18.00-ge deıin).
Astana qalasy Bilim berý basqarmasynyń dırektory Ásıma Bımendınanyń aıtýynsha, elordada mundaı barlyǵy 40 ortalyq ashý josparlanyp otyr jáne olar tolyǵymen memlekettiń balansynda bolatyndyqtan, ata-analarǵa qyzmetter aqysyz kórsetiletin bolady.
Alǵashqy ortalyqqa balalardy qabyldaý keler jyldyń qańtarynan bastap júrgiziledi.
