Astanada balalardy balabaqshaǵa qabyldaý bastalady
ASTANA. QazAqparat - Jyl saıyn balabaqshalardan mektep jasyna jetken balalar ketken soń 3000-ǵa jýyq oryn bosaıdy. Atalǵan mekemelerdiń meńgerýshileri bosaǵan oryndarǵa qabyldanatyn balalardyń jasy men sany kórsetilgen ótinimder beredi.
Bul týraly elorda ákimdiginiń resmı saıtynda habarlanǵan. Aıta keteıik, jalpy oryndar sanynyń 20-25% jeńildikti kezek boıynsha ótetin balalarǵa beriledi, qalǵany 2-6 jastaǵy balalar arasynda bólinedi. Bul ár jastaǵy balaǵa 600-700 jýyq oryndy quraıdy. Astana qalasynyń Bilim basqarmasy usynǵan málimetter boıynsha, bıyl balalardy qabyldaý 2 maýsymnan 2 shildege deıingi aralyqta ótedi. Sodan keıin ata-analarǵa balabaqshaǵa joldamalar beriledi. Jumys komıssııasy balanyń jasyna qaraı kezektilik boıynsha qabyldaıdy. Mysaly, 2012 jyly týǵan balalardy qabyldaý 2-5 maýsymda; 2011 j.t. - 9-12 maýsymda; 2010 j.t. - 13-16 maýsymda; 2009 j.t. - 18-19 maýsymda; 2008 j.t. 23-24 maýsymda júrgiziledi. Jumys komıssııasy №61 orta mektepte saǵat 15.00-18.00 aralyǵynda kúnine 300 adam qabyldaıdy. Jeńildikti sanattar boıynsha azamattar qujattaryn ústimizdegi jyldyń 25 mamyryna deıin tapsyrýlary kerek. Al keshikken jaǵdaıda qujattar tek kelesi qabyldaý kezinde, ıaǵnı 2015 jyly ǵana qaralatyn bolady. Aıta keteıik, qazirgi ýaqytta balany balabaqshaǵa ornalastyrý máselesi asa ózekti bolyp otyr. Óıtkeni, jyl saıyn bala týý kórsetkishi orta eseppen 1,1% (850-900 balaǵa) artýda. Sonymen qatar, halyqtyń elordaǵa kóship kelýi de ulǵaıýda. Jyl basynda mundaǵy halyqtyń ósimi 4369 adamdy qurady.