Astanada balalardyń terezeden qulaýy keıingi úsh jylda kóbeıgen
ASTANA. KAZINFORM — Elordada keıingi úsh jylda balalardyń terezeden qulaý jaǵdaılary aıtarlyqtaı kóbeıgen. Bul týraly № 2 kópbeıindi qalalyq balalar aýrýhanasy dırektorynyń orynbasary Medet Nuǵmanov málimdedi.
Onyń aıtýynsha, osy ýaqyt aralyǵynda mundaı oqıǵalar sany 31-den 85-ke deıin jetken. ıAǵnı kórsetkish úsh esege jýyq artqan. Sonymen birge jaraqattyń aýyrlyǵy da kúsheıip otyr.
— 2023 jyly bir bala kóz jumsa, 2024 jyly — 4, al 2025 jyly 9 bala qaıtys boldy. Bul tek oqıǵalar sany ǵana emes, olardyń saldary da aýyrlap bara jatqanyn kórsetedi, — dedi Medet Nuǵmanov Astana qalasynyń kommýnıkatsııalar qyzmetinde ótken brıfıngide.
Mamannyń sózinshe, mundaı jaǵdaılar kóbine mektep jasyna deıingi balalar arasynda kezdesedi. Ásirese 1 jastan 5 jasqa deıingi balalar qaýipke jıi ushyraıdy.
— Bul jastaǵy balalar aınalasyn tanyp-bilýge qumar, biraq qaýipti ańǵara bermeıdi. Sol sebepti olar terezeden qulap ketýi múmkin, — dedi ol.
Onyń aıtýynsha, qaıǵyly oqıǵalardyń negizgi sebepteri turmystyq jaǵdaılarmen baılanysty. Atap aıtqanda, balalardy qaraýsyz qaldyrý, tereze mańyna jıhaz qoıý jáne masadan qorǵaıtyn torlardy qaýipsiz dep qabyldaý osyndaı jaǵdaılarǵa ákeledi.
— Mundaı oqıǵalar sanaýly sekýnd ishinde bolady. Eresekterdiń az ýaqytqa nazar aýdarmaýynyń ózi úlken qaýipke soqtyrady, — dedi spıker.
Aıta keteıik, buǵan deıin Qyzylordada balalardyń terezeden qulaý derekteri tirkelip, mamandar ata-analardyń salǵyrttyǵyn negizgi sebep retinde ataǵan edi.
