Astanada balalar jarysy ótedi
ASTANA. KAZINFORM – Astanada 1 maýsym – Halyqaralyq balalardy qorǵaý kúnine oraı dástúrli Kids Run balalar jarysy ótedi. Jarystyń bastalýy 1 maýsym kúni saǵat 09:00-de Astana qalasynyń Ortalyq saıabaǵyndaǵy shańǵy-roller trassasynda ótedi, dep jazdy Astana ákimdiginiń resmı saıty.
Jarysqa 6-15 jas aralyǵyndaǵy uldar men qyzdar qatysa alady. Qatysýshylar jas erekshelikterine qaraı 300, 500 jáne 1000 metr qashyqtyqtarda synǵa túsedi. Qatysýshylar sany shekteýli – jarysqa tek 500 bala qatysa alady.
– Bizdiń basty maqsattarymyzdyń biri – balalardyń densaýlyǵyn nyǵaıtý, olardy sportqa baýlý jáne salaýatty ómir saltyn nasıhattaý. Kids Run jarysy jyl saıyn balalar men olardyń ata-analary arasynda úlken qyzyǵýshylyq týdyrady. Qatysýshylar sany 500 adammen shektelgen. Osyǵan baılanysty ata-analar men qatysýshylardy aldyn ala onlaın tirkelýge shaqyramyz. Jarysqa qatysý tegin, – dedi qalalyq dene shynyqtyrý jáne sport basqarmasynyń baspasóz hatshysy Madına Aıtqalıeva.
Kids Run jarysyna onlaın tirkelý 29-31 mamyr aralyǵynda ótedi. Tirkelý saıty: reg.elordasport.kz. Barlyq qatysýshyǵa márege jetkeni úshin medal tabystalady.
Balalardy qorǵaý kúnine oraı uıymdastyrylatyn Kids Run jarysy Astana qalasy ákimdiginiń qoldaýymen ótip, ony Astana qalasynyń Dene shynyqtyrý jáne sport basqarmasy uıymdastyrady.
