Astanada balalar zardap shekken jol apattarynyń 70 paıyzyna júrgizýshiler kináli
ASTANA. QazAqparat - Jyl basynan beri elordada balalar zardap shekken jol apattarynyń 70 paıyzyna júrgizýshiler kináli bolǵan, dep habarlaıdy «QazAqparat» HAA tilshisi Astana qalalyq ІІD-ge silteme jasap.
Balalardyń jol boıynda jaraqat alýynyń aldyn alý maqsatynda jáne jazǵy demalystar qarsańynda 1 mamyr - 1 maýsym aralyǵynda Astanada «Balalardyń joldaǵy qaýipsizdigi» atty keń aýqymdy respýblıkalyq aktsııa ótkizile bastady.
Shara barysynda polıtsııa qyzmetkerleri jas qozǵalys ınspektorlarymen birge mektep oqýshylaryna jaryqqa shaǵylysatyn bilezikter tabystaıdy. Astana qalasy ákimdiginiń «Balalar úıi» MKK jáne «Kámelet jasqa tolmaǵandardy beıimdeý ortalyǵy» MKK-niń 60-qa jýyq tárbıelenýshisi «Qala joldaryndaǵy oqıǵa» spektaklin tamashalaı alady. Sondaı-aq, avtobýstar men aıaldamarǵa júrgizýshilerdi jol erejelerin saqtaýǵa shaqyratyn balalardyń salǵan sýretteri ilinedi. Odan bólek, qoǵamdyq kólik salondaryndaǵy teleekrandar men qalalyq kınoteatrlardan Jolda júrý erejesi týraly áleýmettik rolıkter kórsetiledi.
«Astana qalasynyń ІІD Jergilikti polıtsııa qyzmeti jol-kólik jaraqattarynyń aldyn alýǵa baǵyttalǵan sharalardy turaqty túrde júrgizip turady. Maqsatty jumys nátıjesinde 2017 jyldyń alǵashqy 4 aıynda elordadaǵy jol-kólik oqıǵalarynyń sany 28,6 paıyzǵa azaıdy, onyń ishinde jol apatynan qaza tapqandar sany - 9 paıyzǵa, jaraqat alǵandar 23 paıyzǵa tómendegen. Kámelet jasqa tolmaǵan balalardyń qatysýymen bolatyn jol apattary 20 paıyzǵa, zardap shekken balalar sany 16 paıyzǵa azaıdy, qaza tapqandar joq», - delingen ІІD-niń taratqan habarlamasynda.
Júrgizilgen sharalarǵa qaramastan, jol-kólik jaraqattary máselesi ózekti kúıinde qalyp otyr. Jyl basynan beri Astanada balalardyń qatysýymen bolǵan jol apattarynyń 70 paıyzyna júrgizýshiler kináli bolǵan, zardap shekken balalar avtokólikte jolaýshy retinde otyrǵan.
Atap óteıik, 2017 jyl bastalǵaly Astanada 5 myńǵa jýyq jaıaý júrginshi ruqsat etilmegen jerde joldy kesip ótkeni úshin ákimshilik jaýapkershilikke tartyldy.
